व्यवसायको आकार बढाउँदा यस बैंककाे कर्जा निक्षेप अनुपातले सीमा छाेएपश्चात पूँजी कोष अनुपात भने खुम्चिएको छ । जसलार्इ बैंकलार्इ बाेनस बाँडेर पूँजी बढाएर सुधार गर्नसक्छ ।
गत आर्थिक वर्षको प्रथम त्रैमासमा बैंकको वार्षिक प्रतिशेयर आम्दानी (इपिएस) ८ रुपैयाँ ७ पैसा रहेकोमा नाफामा उच्च बढोत्तरी हुँदा १९ रुपैयाँ ७१ पैसामा बढाेत्तरी भएको हाे ।
खुद नाफामा फड्काे
कुमारी बैंकले बुधबार प्रकाशित गरेको नेपाल फाइनान्सियल रिपोर्टिङ स्ट्याण्डर्ड (एनएफआरएस) रिर्पोट अनुसार खुद नाफामा गत वर्षको यसै अवधिको तुलनामा १४३.६६ प्रतिशतकाे छलाङ्ग नै मारेकाे छ ।
बैंकले गत वर्षकाे तुलनामा २० करोड ७४ लाखले खुद नाफामा बढोत्तरी गर्दै ३५ करोड १८ लाख रुपैयाँ आर्जन गरेको हाे ।
गत वर्ष बैंकले १४ करोड ४३ लाख खुद नाफा कमाएको थियो ।
साना बैंक तथा वित्तीय संस्थाहरुलाई आफूमा विलन गराउँदा व्यवसायको आकारमा भएकाे वृद्धिले कुमारीले नाफा बढेकाे हाे । यस बैंकले काष्ठमण्डप, महाकाली, काँक्रेविहार डेभलपमेन्ट बैंक र पश्चिमाञ्चल फाइनान्सलाई आफूमा बिलिन गराएको थियो ।
खुद नाफाभन्दा फ्रि प्रोफिट १० करोड कम
एनएफआरएस रिर्पोट अनुसार बैंकले खुद नाफामा राष्ट्र बैंकको व्यवस्था अनुरुप रेगुलेटरी एड्जस्टमेन्टमा १० करोड ७ लाख रुपैयाँ व्यवस्था गर्दा बैंकको खुद नाफा भन्दा लाभांश क्षमता घटेको हो ।
प्रतिवेदन अनुसार बैंकले २५ करोड १० लाख रुपैयाँ वितरण योग्य नाफा (फ्रि प्रोफिट) आर्जन गरेको उल्लेख छ । गत वर्ष यस्तो रकम ११ करोड २० लाख रुपैयाँ मात्र रहेको थियो । समीक्षा अवधिमा भने बैंकको फ्रि प्रोफिट १३ करोड ८९ लाख रुपैयाँले बढेको छ ।
राष्ट्र बैंकको व्यवस्था अनुरुप रेगुलेटरी एड्जस्टमेन्ट पश्चात कायम हुने वितरण योग्य नाफा (फ्रि प्रोफिट) केन्द्रीय बैंकले तोकेको प्रावधान अनुसार तोकिएको शिर्षकहरुमा व्यवस्था गरेपश्चात बैंकले शेयरधनीलाई लाभांश वितरणमा उपयोग गर्न सक्दछ ।
(रकमलार्इ हजारमा देखाइएकाे छ ।)
व्यवसाय विस्तारमा केन्द्रीत हुँदै
कुमारीले चालू आर्थिक वर्षको तीन महिना अवधिमा निक्षेप संकलन र कर्जा विस्तारलाई बढाउँदै आफ्नो खुद नाफा बढाएसँगै बैंकको अधिकांश सूचक सकारात्मक देखिएका छन् ।
समीक्षा अवधिमा कुमारी बैंकले ३२.२४ प्रतिशतले निक्षेप बढाउँदा कर्जा लगानी ४६.५१ प्रतिशतले बढेको छ । गत आर्थिक वर्षमा रहेको ५४ अर्ब ८२ करोड ४१ लाख निक्षेपलाई बैंकले ७२ अर्ब ४९ करोड ८२ लाख पुर्याएको छ भने कर्जा परिचालनतर्फ ४६ अर्ब २९ करोड २२ लाखबाट ६७ अर्ब ८२ करोड ४२ लाखमा बढोत्तरी गरेको भएको छ ।
चुक्ता पूँजी र जगेडा कोष
बैंकको चुक्ता पूँजी ५ अर्ब ९६ करोड ९४ लाखबाट समीक्षा अवधिमा बैंकको २० प्रतिशत बढेर ७ अर्ब १६ करोड ३० लाख रुपैयाँ पुगेको छ ।
बैंकको जगेडा कोष २ अर्ब २२ करोड ९७ लाखबाट ७७.३७ प्रतिशतले बढेर ३ अर्ब ९५ करोड ४८ लाख रुपैयाँ सञ्चित रहेको छ ।
खुद ब्याज आम्दानी करिब ४२ करोड २३ लाख बढ्यो
कुमारी बैंकले गत वर्षको तुलनामा यस त्रैमासमा ४२ करोड २३ लाख रुपैयाँले खुद ब्याज आम्दानी बढाएको छ । चालू आवको प्रथम त्रैमासमा बैंकको खुद ब्याज आम्दानी रकम ८१ करोड ७६ लाख रहेको छ ।
चालू आवको प्रथम त्रैमासमा २ अर्ब २४ करोड ७७ लाख ब्याज आम्दानी गरेर १ अर्ब ४३ करोड रुपैयाँ ब्याज खर्च गरेको हो । गत बर्ष यसै अवधिमा बैंकको खुद ब्याज आम्दानी ३९ करोड ५३ लाख रुपैयाँ रहेको थियो ।
खराब कर्जा घटाउँदै
समिक्षा अवधिमा बैंकले आफ्नो खराब कर्जा अनुपात घटाउँदै लगेको छ । व्यवसायको आकारमा बढोत्तरी हुँदै जाँदा खराब कर्जा नियन्त्रण गर्न सक्नु बैंकको एक कोणबाट प्रगति नै मान्नुपर्छ ।
गत आर्थिक वर्षको तीन महिना अवधिमा बैंकमा १.९७ प्रतिशत खराब कर्जा अनुपात रहेकोमा यस वर्षमा घटेर १.१४ प्रतिशतमा झरेको छ ।
कर्जा विस्तारले पूँजी कोष साघुँरियो
प्रथम त्रैमासिक प्रतिवेदन अनुसार कुमारी बैंकको पूँजी कोष अनुपात साघुँरिएको छ । गत वर्ष यसै अवधिमा १५.२५ प्रतिशत रहेको बैंकको पूँजी कोष अनुपात १२.९८ प्रतिशतमा झरेको छ ।
बैंकलाई कर्जा विस्तारका लागि पूँजी कोषमा सुधार गर्नुपर्ने अवस्था रहेको छ । राष्ट्र बैंकले तोकेको ८ अर्ब पूँजी कायम गर्न बैंकले कम्तिमा ८४ करोड अर्थात १२ प्रतिशत बोनस वितरण गर्नुपर्ने बाध्यता रहेको छ ।
अर्कोतर्फ बैंकको कर्जा निक्षेप अनुपात राष्ट्र बैंकले तोकेको सीमा ८० प्रतिशत नजिक रहेको छ । बैंकको कर्जा निक्षेप अनुपात ७९.९१ प्रतिशत रहेकोले थप कर्जा प्रवाहमा सीमा लाग्ने अवस्था आएको छ । गत वर्षको यसै अवधिमा बैंकको यस्तो अनुपात ७७.५९ प्रतिशत रहेको थियो ।
त्यस्तै बैंकको आधार ब्याजदर ११.०९ प्रतिशत र कोषको लागत ७.९१ प्रतिशत छ ।