साधारण सभाले संस्थापक समुहको तर्फबाट गुरु प्रसाद न्यौपाने, जिवनराज शाक्य, बच्छराज तातेड, भेजप्रसाद तिमिल्सीना, सर्वसाधारण शेयरधनीको तर्फबाट मिलन खड्का, नोलकुमारी आचार्य (महिलाको प्रतिनिधित्व सहित) र स्वतन्त्रतर्फबाट इन्द्रमणि त्रिताललाइ सर्वसम्वत सञ्चालक समितिमा चयन गरेको हो ।
यस्तै साधारण सभाले आर्थिक वर्ष २०७३/७४ तथा आ.व. २०७४/२०७५ को वासलात, नाफा नोक्सान हिसाब र नगद प्रवाह लगायतका वित्तिय विवरणहरु छलफल गरि स्वीकृत गरेको छ ।
कम्पनीले मेची अञ्चलको पाँचथर र ताप्लेजुङ्ग जिल्लाको सिमाना भएर बहने काबेली नदीको पानीे उपयोग गरी २५ मेगावाट क्षमताको कावेली बी-१ जलविद्युत परियोजना निर्माण गरिरहेको छ ।
परियोजनाको निर्माण कार्य पूरा गरी विद्युत उत्पादन सुरु गरेको आर्थिक वर्ष २०७६/७७ देखि शेयरधनीहरुले लाभांश वितरण गर्न सकिने कम्पनीले जनाएको छ ।
माघ भित्र विद्युत उत्पादन गर्ने
अरुण काबेलीको निमार्ण कार्य अन्तिम चरणमा पुगेको छ । कम्पनीले पुस ३० गते प्रेस विज्ञप्ती जारी गरी २०७५ माघ भित्रै आयोजनाको निर्माण सम्पन्न भई चालु हुने जनाएको छ ।
परियोजनामा निर्माण गर्नुपर्ने हाईड्रोमेकानिकलको कार्य अन्तर्गत पेनस्टक पाईप, गेट निर्माण तथा जडान, ईलोक्टोमेकानिकल तथा स्विचिङ्ग सवस्टेशनमा लाग्ने मेशिनहरु जडान कार्य सम्पन्न भएको छ । यस्तै काबेली देखि अमरपुर सवस्टेशन सम्मको ४.५ किलोमिटर लामो १३२ के.भी प्रसारण लाईन निर्माण गर्ने कार्य सम्पन्न भई लाईन चार्ज समेत भईसकेको कम्पनीले जनाएको छ ।
परियोजनाबाट उत्पादन हुने विद्युतशक्ति नेपाल विद्युत प्राधिकरणले निर्माण गरिरहेको ९० किलोमिटर लामो दमक-काबेली (मेची कोरिडर) १३२ के.भी. डवल सर्किट राष्ट्रिय प्रसारण लाईन आयोजना अन्तर्गत पाँचथरको अमरपुर गा.वि.स. स्थित अमरपुर सबस्टेसनमा जडान गरी विद्युत आपूर्ति गर्ने गरी सम्झौता भएको छ ।
यस परियोजनाबाट वार्षिक १४ करोड १७ लाख ४६ हजार ४७० किलोवाट प्रति घण्टा विद्युतशक्ति उत्पादन हुने प्रक्षेपण गरिएको छ । विद्युत बिक्रीको मूल्य वर्षातकाे ८ महिनाको लागि ४ रुपैयाँ ८० पैसा प्रति किलोवाट घण्टा तथा हिउँदका ४ महिनाको लागि ८ रुपैयाँ ४० पैसा प्रति किलोवाट घण्टा कायम गरिएको छ ।
यस आधारमा परियोजना निर्माण सम्पन्न भई सञ्चालन भएको पहिलो वर्ष ७६ करोड आम्दानी प्राप्त हुने र पाँच वर्ष सम्म बार्षिक ३ प्रतिशतका दरले मूल्य वृद्धि हुने कम्पनीको प्रक्षेपण छ ।
२५ मेगावाट क्षमताको काबेली बि-१ जलविद्युत परियोजना निर्माण पूरा गर्न कूल ४६३ करोड लागत लाग्ने अनुमान छ । हाल सम्म परियोजना निर्माणमा ४५४ करोड रुपैयाँ लगानी भईसकेको छ ।