पूर्व उपप्रधान तथा अर्थमन्त्री भरतमोहन अधिकारीको निधन भएको छ । लामो समय देखि श्वास-प्रश्वासको समस्याले पिडित अधिकारीको ८२ वर्षको उमेरमा शनिवार राति काठमाडौंमा निधन भएको हो ।

तत्कालिन नेकपा (एमाले)का अध्यक्ष मनमोहन अधिकारीले नेतृत्व गरेको सरकारमा अर्थमन्त्री रहँदा उनले ज्येष्ठ नागरिकलाई सामाजिक सुरक्षा भत्ता र आफ्नो गाउँ आफँै बनाऔँजस्ता लोकप्रिय कार्यक्रम ल्याएर जनताको मन जितेका थिए ।

चार पटक सांसद बनेका अधिकारीले भौतिक योजना तथा निर्माण र कानून तथा न्याय मन्त्रालयको पनि जिम्मेवारी सम्हालेका थिए । अर्थमन्त्री भएका बेला अधिकारीले पूँजीगत लाभ करलाई कम गराई पूँजी बजारमा स्थायीत्व कायम गरेका थिए । उनले पूँजीगत लाभ कर संस्थागत १५ प्रतिशत बाट १० प्रतिशत र व्यक्तिगतमा १० प्रतिशत बाट ५ प्रतिशतमा झारेका थिए ।

हाल नेकपाको चुनावी मुल नाराको रुपमा स्थापित भएको वृद्ध भत्ता अधिकारीले नै सुवात गरेका थिए । अधिकारीले सामाजिक सुरक्षा भत्ताका रुपमा ७५ वर्ष पुगेका वृद्धलागि मासिक एक सय रुपैयाँ भत्ता वितरणको सुरुवात गरेका थिए । हाल यसको दायरा विस्तार हुदै फराकिलो भएको छ ।

नेपालको १८ औं अर्थमन्त्रीको रुपमा अधिकारीले पहिलो विकेन्द्रिकृत बजेट ल्याएका थिए । जसले गर्दा गाउँ विकास समिति, नगरपालिका, उपमहानगरपालिका र महनागरपालिकाले विकास निर्माणको लागि सिधै बजेट निष्काशन भयो ।

दिवगंत नेता अधिकारीको पार्थिव शरीर श्रद्धाञ्जलिका लागि नेपाल कम्युनिष्ट पार्टी नेकपा को धुम्बाराहीस्थित केन्द्रीय कार्यालयमा बिहान ९ बजेदेखि मध्याह्न १२ बजेसम्म राखिएकाे थियाे । श्रद्धाञ्जलि कार्यक्रममा पार्टीका अध्यक्षद्धय केपी शर्मा ओली र पुष्पकमल दाहाल प्रचण्डले अधिकारीको पार्थिव शरिरमा पार्टीको झण्डा ओडाएका थिए । दिवङ्गत अधिकारीको राजकीय सम्मानका साथ पशुपति आर्यघाटमा आजै अन्त्येष्टि गरिएकाे  छ ।