कुनै बेला लगानीकर्ताका तर्फबाट आवाज उठाउने एउटा मात्र संस्था थियो । अहिले यस्ता संस्थाहरुको संख्या एक दुना दुई, दुई दुना चार हुने क्रममा छ । सबै संघहरु बजार बढेका बेला सेयर बजार सुधारका सम्बन्धमा खासै आवाज उठाउँदैनन् । तर जब जब बजार ओरालो लाग्छ अनि बजार सुधारको चर्को नारा सुरु हुन्छ ।
शुक्रबार लगानीकर्ताहरुको कान्छो संस्था पूँजीबजार लगानीकर्ता संघले पनि यही श्रृङ्खला स्वरुप धितोपत्र बोर्डमा १२ बुँदे ज्ञापन पत्र बुझाएको हो । यस अघि बुझाइएका ज्ञापनका केही बुँदाहरु सहित संघले बोर्डलाई बजार सुधारका लागि आग्रह गरेको हो । तर संघले विगतमा आफुहरुले दिएका सुझाव र माग कति अघि बढ्यो भन्ने सम्बन्धमा चासो दिएको छैन । अरु संघले पनि यस्तै शैलीमा पटक पटक विषय दोहोर्याएर ज्ञापनहरु बुझाईरहेका छन् ।
लगानीकर्ता संघको ज्ञापन बुझ्दै धितोपत्र बोर्डले संघका सुझाव अनुसार बजार सुधारका कामहरु अघि बढिरहेको जानकारी गराएको छ । संघले उठाएका विषय महत्वपूर्ण रहेको भन्दै यस अघि आएका माग तथा सुझावहरुलाई समेत बोर्डले सकरात्मक रुपमा लिएको जवाफ बोर्डले संघका पदाधिकारीलाई दिएको थियो ।
संघले बोर्डलाई बुझाएको ज्ञापनको पहिलो बुँदामा अहिले सेयर दलालहरुले लिँदै आएको ०.६ प्रतिशत कमिशनलाई अधितम ०.२५ प्रतिशत बनाउनु पर्ने माग गरेका छन् । यो माग लगानीकर्ताका लागि ज्यादै महत्वको विषय हो । घट्दो बजारमा मात्र नभई अरु बेला पनि थोरै कमिशन तिर्दा कमाईको आकारमा केही राहत पुग्ने निश्चित छ ।
दोस्रो बुँदामा अनलाइन कारोबारको मिति तोकेर घोषणा गर्ने उल्लेख छ । तर यसका प्रकृयागत उल्झनमा सहकार्यको विषय उल्लेख छैन । नेप्सेले आगामी साउनदेखि अनलाइन कारोबार प्रणाली सुरु हुने बताई सकेको छ ।
तेस्रो बुँदामा वाणिज्य बैंकलाई ब्रोकर लाइसेन्स दिँदै उपत्यकामा ५० र मोफसलमा १०० सेयर दलाल तत्काल थप गर्नु पर्ने माग छ । नेप्सेको संरचनामा परिवर्तन, नयाँ स्टक एक्सचेञ्जको तत्काल स्थापनाको माग पनि संघले गरेको छ ।
त्यसैगरि गैर अवासीय नेपाली तथा संस्थागत विदेशी लगानीकर्ता भित्र्याउन कार्यविधि बनाएर सार्वजनिक गर्न माग गरेको संघले बुझाएको ज्ञापन यस्तो छ ।