सेयर बजारमा गिरावटको श्रृङ्खला नरोकिँदा लगानीकर्ताको सम्पत्ति मापन गर्ने समग्र बजार पूँजीकरण १४ अर्ब ९७ अर्ब रुपैयाँमा खुम्चिन पुगेको छ । बजारमा हकप्रद सेयरको बढ्दो आपूर्ति र ठूला लगानीकर्ता बजारमा प्रवेश नगर्दा बजार माथि जान सकेको छैन ।

गत विहीबार बजार सामान्य बढेपनि आईतबार फेरी घटेको छ । झण्डै दोहोरो अंकले घटेको साताको पहिलो दिन बजार घटेपनि ३१ कम्पनीको सेयरमूल्य भने बढेको छ ।

सेयर बजारमा सबैभन्दा बढी सेयर कारोबार हुने 'क' वर्ग समूहको परिसूचक नाप्ने सेन्सेटिभ इन्डेक्स ०.७० प्रतिशतले घटेर २७२.४७ अंकमा झरेको छ । समग्र सेयर बजार परिसूचक नेप्से ९.४० अंकले ओरालो लागेर १२७८ दशमलव ९६ अंकमा बन्द भएको छ ।

गत विहीबारको तुलनामा कारोबार रकममा भने सुधार आएको छ । १५२ कम्पनीका ८ लाख ३३ हजार ९८६ कित्ता सेयर ३ हजार ८०५ पटकको कारोबार हुँदा ३० करोड चार लाख रुपैयाँको सेयर किनबेच भएको छ । जुन विहीबारको तुलनामा ७ करोड रुपैयाँ बढी हो ।

कारोबारमा आएका नौ वटै उप-समूहमा रातो रङ्ग पोतिएको छ । होटल समूह सबैभन्दा बढी ७० अंकले घट्दा अन्य समूह सबैभन्दा कम १.३२ अंकले ओरालो लागेको छ ।

यसदिन सबैभन्दा बढी ७० प्रतिशत लाभांश घोषणा गरेको नेपाल लाईफको सबैभन्दा बढी दुई करोड ६३ लाख रुपैयाँ बराबरको सेयर खरिद विक्री भएका छन् । बैंक घोटालाका अभियुक्तलाई सिआईबीले पक्राउ गरेपछि नेपाल क्रेडिट एण्ड कर्मस बैंकको सेयर कारोबार आइतबार अधिक भएको छ । सेयरमूल्य घटेपछि बैंकको सबैभन्दा बढी ८६ हजार २०२ कित्ता सेयर दुई करोड ३२ लाख रुपैयाँमा किनबेच भएको हो । सूर्या लाईफ इन्स्योरेन्सको संस्थापक, नबिल बैंक र इन्भेष्टमेन्ट बैंकको संस्थापक सेयर सकेत एक करोड बढीको कारोबार भयो ।

३१ कम्पनीका सेयरधनीले कमाएका बजारमा सबैभन्दा बढी कमाएका छ्याङ्दी हाईड्रोका लगानीकर्ताले पनि ४ प्रतिशतले मात्र कमाउन सके । स्वदेशी लघुवित्त, युनाईटेड इन्स्योरेन्स र बेष्ट फाइनान्सको सेयरमूल्य ३ प्रतिशत बढीले बढेको छ ।

उता अधिकाशं कम्पनीको सेयरमूल्य घटेको बजारमा अपि पावरका सेयरधनीले १० प्रतिशतले गुमाएका छन् । कालिका माईक्रोक्रेडिट, सोल्टी होटल, लक्ष्मी लघुवित्त र सूर्या लाईफ इन्स्योरेन्सको सेयर मूल्य पनि ४ प्रतिशत बढीले घट्न पुगेको छ । नेशनल हाईड्रोपावरेको सेयरमूल्य भने आईपिओभन्दा कम प्रतिकित्ता ९७ रुपैयाँमा झरेको छ ।