चाकु बजारबाट २० किमी माथि रहेको सो आयोजनाको कुल लागत तीन अर्ब रुपैयाँ रहेकोमा लागत वृद्धि भई अब प्रति मेगावाट १८ करोडले झण्डै चार अर्ब रुपैयाँ पुगेको छ ।
वि.सं. २०६८ मा शुरु भई तीन वर्षभित्र सम्पन्न गर्ने लक्ष्य रहेपनि २०७१ को जुरे पहिरो, २०७२ को भूकम्प तथा भारतीय नाकाबन्दी र २०७३ को भोटेकोशी नदीमा आएको बाढीले असर पु-याएपछि आयोजना सम्पन्न हुने समयसीमा लम्बिएको आयोजनाले जनाएको छ ।
साविक फुल्पिङकट्टी गाविसको हाल भोटेकोशी गाउँपालिका अन्तर्गत चन्द्रापुमा बाँधबाँधी ३.३ किमी सुरुङमार्गद्वारा मार्मिङको याङ्लेफाँटमा निर्मित विद्युत गृहमा पानी खसालिनेछ ।
आयोजनास्थलदेखि लामो साँघुस्थित सव स्टेशनसम्मको २२ किमी प्रशारण लाइनद्वारा केन्द्रीय प्रशारण लाइनमा जोडिनेछ । हालसम्म विद्युत् गृहमा मेसिन तथा प्रशारण लाइनको तार जडान गर्न मात्र बाँकी रहेको आयोजनाले जनाएको छ ।
उक्त कम्पनीले सिन्धु्पाल्चाेकमा अपर बलेफी आयोजनाको निर्माण कार्यलाई समेत तीव्रता दिएको छ । ६ अर्ब रुपैयाँ लगानीमा ३६ मेगावाटको विद्युत् आयोजनाको निर्माण कार्यलाई तीव्रता दिइएको कार्यकारी निर्देशक कसजूले बताए ।
शिव श्री हाइड्रोपावरले आयोजना प्रभावित सिन्धुपाल्चोकका स्थानीय बासिन्दालाई १४ लाख ७६ हजार चार सय कित्ता साधारण सेयर निष्कासन गर्न नियामक निकाय धितोपत्र बोर्डसँग माघ २४ गते अनुमति माग गरेको छ ।
