२ दशकसम्म लगानीकर्तालाई कुनै पनि किसिमको लाभांस दिन नसकेको बैंकले निरन्तरको सुधार पछि अहिले लाभांस खुवाउने हैसियत बनाएको छ । बैंकका प्रमुख कार्यकारी अधिकृत शाहले भने, ‘चालु आर्थिक वर्षको वासलात स्वीकृत भए पश्चात ३२ प्रतिशतसम्म बोनस बितरण गर्न सक्ने अवस्थामा बैंक पुगेको छ । तर कति लाभांस बितरण गर्ने भन्ने सम्बन्धमा सञ्चालक समितिले निर्णय गर्छ ।’ एफपीओको प्रिमियम अरु शिर्षकमा खर्च गर्न नमिल्ने बताएका उनले एकै पटक वा चरणबद्ध रुपमा बोनस प्रस्ताव हुने बताए ।
एफपीओ बिक्री गरेर मात्र बैंकको जगेडा कोषको आकार ३ अर्ब १६ करोड रुपैंयाले बढ्नेछ । उक्त रकमका साथै बैंकले नियमित कमाईबाट पनि लाभांस बितरणको आधार बनाउँदै लैजाने बैंकका प्रमुख कार्यकारी अधिकृत शाह बताए ।
पत्रकार सम्मेलनमा शाहले नेपाल बैंक सम्पत्ती बेचेर मात्र सुध्रिएको भन्ने भ्रममा धेरै लगानीकर्ता परेकाे बताए । उनले भने, ‘धेरैलाई अहिले पनि यो भ्रम छ कि, नेपाल बैंकले सम्पत्ती बेचेर मात्र कमाई बढाएको छ । नियामकले तोकेको पूँजी पुगिसकेको सन्दर्भमा अचल सम्पत्ती बेच्ने काम बन्द भैसकेको छ । सम्पत्ती बेचेका कारण मात्र बैंकको कमाई बढेको कुरा सत्य हैन ।’
बैंकसँग अझै १५ अर्ब बढीको अचल सम्पत्ती रहेको जानकारी दिँदै शाहले वासलातमा त्यसको मुल्यांकन न्युन भएको बताएका थिए । वास्तविक सम्पत्ती खुलाउन पाएको अवस्थामा बैंकको वित्तीय अवस्था अहिलेको भन्दा धेरै राम्रो हुने उनको दाबी छ ।
बैंकसँग रहेको राष्ट्रिय बीमा कम्पनीको सेयर बेच्ने निर्णय सञ्चालक समितिले गरिसकेको छ । यद्यपि राष्ट्रिय बीमा कम्पनीको साधरण सभामा देखिएको अन्यौल कारण सेयर बेच्न नसकिएको उनको तर्क छ । कम्पनीको पहिलो साधारण सभा भए लगत्तै बैंकले प्रकृया पुरा गरेर एक अर्ब बढीको सेयर बेच्ने उनको भनाई थियो ।
फुलबारी रिसोर्टमा फसेको बैंकको ७५ करोड असुल हुने बताएका उनले यसमा भएको प्रगति भने प्रष्ट पारेनन् । वर्षौं पहिले भएको उक्त लगानीको व्याज तथा समयानुकुल रुपमा बढेको मूल्यांकनको लेखाजोखा भएको छैन । शाहले भने रिसोर्ट किन्न चाहनेहरुसँग कुरा भैरहेको भन्दै ठुलो रकम असुल हुने बताएका थिए ।
...[एफपिओ निष्काशन गर्न लागेको नेपाल बैंकको यस्तो छ तीन बर्षे प्रगति]...