बैंकहरुले निक्षेपको व्याजदर घटाउन थाले, आधा दर्जन बैंकहरुले कति दिन्छन् व्याज ?

Jul 10, 2018 Merolagani

नेपाल बैंकर्स संघ र विकास बैंक संघले व्याजदरका सम्बन्धमा पछिल्लो पटक भद्र सहमति गरे पछि बैंकहरुले व्याजदर घटाउन थालेका छन् । यस साता मात्र आधा दर्जनको हाराहारीमा वाणिज्य बैंक तथा विकास बैंकहरुले निक्षेपको व्याजदर घटाएका छन् । यसले कर्जाको व्याजदरमा पनि गिरावट आउने आशा गरिएको छ ।

पछिल्लो साता स्टाण्डर्ड चार्टर्ड बैंक, ग्लोबल आईएमई बैंक, एभरेष्ट बैंक, सानिमा बैंक, मुक्तिनाथ विकास बैंक र ओम डेभलपमेण्ट बैकले नयाँ व्याजदर सार्वजनिक गरेका छन् । उल्लेखित बैंकहरुमा मुक्तिनाथ विकास बैंक तथा ओम डेभलपमेण्ट बैंकको निक्षेपको व्याजदर उच्च छ भने स्टाण्डर्ड चार्टर्ड बैंकको व्याजदर सबैभन्दा न्युन छ ।

ओम डेभलपमेण्ट बैंकले मुद्धती निक्षेपमा १० देखि साढे ११ प्रतिशतसम्मको व्याजदर प्रस्ताव गरेको छ भने साधारण बचततर्फ ७ देखि ८ प्रतिशतसम्मको व्याजदर प्रस्ताव गरेको छ ।

त्यसै गरि मुक्तिनाथ विकास बैंकले पनि १० देखि साढे ११ प्रतिशतसम्मको व्याजदरमा मुद्धती निक्षेपको प्रस्ताव अघि सारेको छ । साधारण बचततर्फ पनि मुक्तिनाथले ७ देखि ८ प्रतिशत व्याज दिने योजना सार्वजनिक गरेको छ । मुक्तिनाथले कर्जातर्फको अधिकतम व्याजदर खुद्रा लघुवित्त कार्यक्रमका लागि १९.५४ प्रतिशत व्याजदर तोकेको छ । सेयर कर्जाका लागि १७.५४ प्रतिशत व्याजदर तोकेको बैंकले न्युनतम १६.५४ प्रतिशतको दरमा कृषि कर्जा उपलब्ध गराउने छ ।

यता वाणिज्य बैंकतर्फ सानिमा बैंकले साधारण बचतमा ५ प्रतिशत व्याज दिने भएको छ । साधारण बचततर्फका सबै शिर्षकमा बैंकले ५ प्रतिशत व्याज दिने व्यवस्था गरेको हो । मुद्धती निक्षेपको हकमा भने ज्येष्ठ नागरिकलाई मात्र मासिक रुपमा व्याज भुक्तान गर्दै सामान्य बचतकर्तालाई त्रैमासिक रुपमा न्युनतम साढे ९ प्रतिशतदेखि अधिकतम साढे १० प्रतिशत व्याज दिने भएको छ ।

त्यसै गरी ग्लोबल आईएमई बैंकले निक्षेपमा ४ देखि ६ प्रतिशतसम्म व्याज दिने प्रस्ताव गरेको छ । एउटा शिर्षकमा मात्र ६ प्रतिशत व्याजदर प्रस्ताव गरेको बैंकको सबै शिर्षकको व्याजदर साढे ५ प्रतिशतभन्दा तल छ ।

एभरेष्ट बैंकले साधारण बचतकर्तालाई ३ देखि पौने ५ प्रतिशतसम्म मात्र व्याज दिने भएको छ । बैंकले कुल २३ शिर्षकका बचत योजनामा सेभिगं पेन्सनलाई मात्र पौने ५ प्रतिशत व्याज दिने भएको हो । एभरेष्टका धेरै शिर्षकका बचत योजनाको व्याजदर साढे ३ प्रतिशतभन्दा तल छ ।

निक्षेपमा सबैभन्दा थोरै व्याज दिने स्टाण्डर्ड चार्टर्ड बैंकको ११ वटा बचत योजना मध्ये ८ वटाको व्याजदर २ देखि पौने ३ प्रतिशतसम्म छ । बाँकी ३ वटा बचत योजनामा बैंकले ३ देखि ४ प्रतिशतसम्म व्याज प्रदान गर्ने भएको हो ।

बैंकहरुको निक्षेपको व्याजदर सस्तो हुँदा कर्जाको व्याजदर पनि स्वभाविक रुपमा सस्तो हुन्छ । अहिले चर्को व्याजदरका कारण समग्र वित्त बजार नै हलचलको अवस्थामा पुग्दा व्याजदरमा आएको गिरावटले केही राहत पुग्ने आँकलन गर्न सकिन्छ ।

comments powered by Disqus

माथिल्लो तामाकोशीको शेयर: आईपिओ भर्नेले जिते कि दोस्रो बजारका कारोबारीले ?

Jan 23, 2019

ठूलो संख्यामा सर्वसाधारणमा शेयर निष्काशन गरेको माथिल्लो तामाकोशी जलविद्युत आयोजना (UPPER) को शेयरमा आईपिओ भरेका धेरै लगानीकर्ता अहिले अलमलमा परेका छन्। दोस्रो बजारका कारोबारीहरुको नियन्त्रणमा केहि दिन कम्पनीको शेयर कारोबार हुँदा आईपिओका आवेदक भने अलमलमा परेका हुन् ।