विभागले झण्डै ५ महिना पछि फेरि तेस्रो पक्षले पाउने क्षतिपूर्ति रकम बढाउने प्रस्ताव गरेको हो । विभागले हाल कायम क्षतिपूर्ति रकमलाई दोब्बर बनाउने गरी प्रस्ताव गरेको छ ।
अहिले तेस्रो पक्षको मृत्यु भई मानवीय क्षति भएका पीडित परिवारलाई ५ लाख रुपैयाँ र घाइतेको उपचारको लागि ३ लाख रुपैयाँ व्यवस्था गरिएको छ ।
यसलाई दोब्बर बनाएर १० लाख र ६ लाख रुपैयाँ पुर्याउने प्रस्ताब पेश गर्ने तयारी भएको यातायात व्यवस्था विभागका सूचना अधिकारी गोकर्ण प्रसाद उपाध्यले जानकारी दिए ।
यस्तै स्पाइनल इञ्जुरी र हेड इञ्जुरीका घाईतेहरुको उपचारका लागि १५ लाख रुपैयाँ उपलब्ध गराउने प्रस्ताव पनि तयार पारिएको छ ।
विभागले तयार पारेको प्रस्ताव पूर्वाधार तथा यातायात मन्त्रालय र अर्थमन्त्रालयबाट स्वीकृत भएपछि बीमा समितिले बीमालेख तयार गर्ने विभागका सूचना अधिकारी उपाध्यले बताए । यस विषयमा बीमा समिति समेत सकारात्मक रहेकोले तेस्रो पक्षको क्षतिपूर्ति शुल्क वृद्धि हुने उनको भनाई छ ।
तेस्रो पक्षले पाउने क्षतिपूर्ति रकम न्यून भएको भन्दै गत साउनमा सरकारले सवारी साधनहरुको बीमा रकम सम्बन्धी पुनरावलोकन गर्न बीमा कम्पनीहरुलाई प्रस्ताव माग गरेको थियो । उनीहरुले चासो नदेखाएपछि क्षतिपूर्ति रकम वृद्धि हुन सकेको थिएन ।
