बोर्डले कम्पनीलाई सर्वसाधारणलाई छुट्टाएको २९ लाख १२ हजार ५५० कित्ता र स्थानीय बासिन्दाहरुलाई जारी गर्दा बिक्री नभएको ६ लाख २१ हजार ७९० कित्ता शेयर सहित कूल ३५ लाख ३४ हजार ३४० कित्ता बिक्री गर्न अनुमति दिएको हो ।
मुद्रा तथा पूँजी बजार अध्ययन कार्यदलको सुझाव अनुसार सबैभन्दा खराब रेटिङ्ग (ग्रेड ५) पाउने हाइड्रोपावर कम्पनीलाई सार्वजनिक निष्काशन गर्न बन्देज लगाउने व्यवस्था गरेको थियो । युनियन हाइड्रोपावरले यसअघि स्थानीय बासिन्दाका लागि शेयर निष्काशन गरिसकेकाले अनुमति पाएको हो ।
बोर्डले यसअघि आयोजना प्रभावित बासिन्दालाई शेयर निष्काशन गरिसकेका कम्पनीलाई भने कमजोर रेटिङ्ग पाएपनि सो व्यवस्था लागु नहुने जनाएको थियो । सो व्यवस्था अनुसार कम्पनीले आईपिओ निष्काशन अनुमति पाएको हो ।
ग्रेड ५ को व्यवस्था स्थानीयलाई शेयर बेचिसकेका कम्पनीमा लागू नहुने
युनियन हाइड्रोपावर कम्पनीको साधारण शेयरलाई इक्रा नेपालले ग्रेड पाँच रेटिङ्ग दिएको छ । यसले कम्पनीको वित्तीय अवस्था कमजोर रहेको जनाउँछ ।
युनियन हाइड्रोपावरले यसअघि लमजुङ्गका स्थानीयका लागि साउन १४ देखि भदौ १२ गतेसम्म ७ लाख ५० हजार कित्ता आईपिओ जारी गरेको थियो । सो आईपिओ एक लाख २८ हजार २१० कित्ता मात्र माग भएकाले असोज ७ गते बाँडफाँड गरेको थियो ।
युनियन हाइड्रोपावरको आईपिओ निष्काशन तथा बिक्री प्रबन्धक लक्ष्मी क्यापिटल रहेको छ।कम्पनीको अधिकृत पूँजी एक अर्ब, जारी पूँजी ७५ करोड र चुक्ता पूँजी ३८ करोड ३७ लाख ४५ हजार रुपैयाँ रहेको छ। शेयर जारी पश्चात कम्पनीमा संस्थापक-सर्वसाधारण शेयर अनुपात क्रमश: ५१.१६६ र ४८.८३४ कायम हुनेछ ।
कम्पनीले लमजुङ जिल्लाको करापुटार गाविसमा ३.३ मेगावाटको मिदिम खोला आयोजना निर्माण गरि २०७४ माघ १५ गतेदेखि सञ्चालनमा ल्याएको छ । कम्पनीले २३ मेगावाट क्षमताको मेवा खोला आयोजना निर्माणका लागि सर्वेक्षण अनुमतिपत्र समेत पाएको छ। कम्पनीले ३.३ मेगावाटको मिदिम खोला जलविद्युत्त आयोजना सञ्चालन गरिरहेको छ भने २३ मेगावाटको मेवा खोलाको अनुमति पाएको छ ।
मिदिम खोला आयोजना आयोजनाको लागत बढेर ७९ करोड ५० लाख ७७ हजार रुपैयाँ पुगेको छ । आयोजनाको प्रतिमेगावाट लागत २६ करोड ५० लाख रुपैयाँ छ ।
यस कम्पनीमा कार्यकारी अध्यक्ष किरण मल्लको सबैभन्दा धेरै १७ लाख ९ हजार ५०४ कित्ता र शालिकराम घिमिरेको १० लाख ४४ हजार ५०८ कित्ता शेयर स्वामित्व रहेको छ ।
याे पनि पठ्नुहाेस्...............
न्यून रेटिङ गरेका कम्पनीले आईपिओ जारी गर्न नपाउने, आईपिओ र एफपीओमा पनि नयाँ नियम