सर्वोत्तमको शेयर दोस्रो बजारमा कारोबारमा आएदेखि नै निरन्तर सर्किट लेभलमा कारोबार हुँदै आएको थियो । आइतबार नकारात्मक सर्किट लेभलमा कारोबार भएको कम्पनीको शेयरमा सोमबार पनि घट्ने क्रमलाई निरन्तरता दिएको हो ।
यस समाचार तयार पार्दाको अवधिसम्ममा कम्पनीको शेयर ५.०८ प्रतिशतले घटेर ९२५ रुपैयाँमा कारोबार भइरहेको छ । १,०८३ पुगेकाे शेयर मूल्य ९२५ रुपैयाँमा आइपुगेकाे छ । पछिल्लो समय सर्वोत्तमका शेयरमा लगानीकर्ता चासो धेरै देखिएको छ । बुक बिल्डिङ विधिबाट आईपीओ निष्काशन भएको पहिलो कम्पनी र कारोबारमा थोरै शेयर रहदा पनि लगानीकर्ताको आकषर्ण परेको हो ।
सर्वोत्तम सिमेन्ट कम्पनीको पहिलो दिन नेटवर्थको तीन गुणा अर्थात ५ सय ५६ रुपैयाँबाट कारोबार शुरु भएको थियो । सिमेन्टको शेयरले निरन्तर सातौ कारोबार दिनसम्म सर्किटमै कारोबार भएर आठौं र नवौं कारोबार दिन घटेको हो ।
यस कम्पनीको आईपीओमा करिब ५५ हजार लगानीकर्ताले ५० कित्ताको दरले शेयर पाएका थिए । लगानीकर्ताले शेयर भर्न प्रति कित्ता ३ सय ६० रुपैयाँ ९० पैसाका दरले ५० कित्ता शेयर भर्न १८ हजार ४५ रुपैयाँ लगानी गरेका थिए ।
