निर्जीवन बीमा कम्पनीहरुमा बीमा बीमितहरुले बीमा रकम दावी गर्ने क्रम बढेसंगै कम्पनीहरु दबाबमा परेका हुन् ।
नेपाल बीमा प्राधिकरण स्रोतका अनुसार बाढी पहिरोले पारेको क्षतिपछि बीमा रकम दावी माग गर्ने क्रम शुरु भएको छ । बाढी पहिरोबाट क्षति पुगेका २० वटा जलविद्युत कम्पनीहरुको तर्फबाट कम्पनीहरुमा बीमा दावी परिसकेको छ । स्रोतका अनुसार जलविद्युत कम्पनीहरुको तर्फबाट मात्र ४ अर्वभन्दा बढीको बीमा रकम दावी भएको छ ।
त्यस्तै यसपटक बाढी पहिरोको कारण घर तथा सम्पत्तिमा भएको क्षतिको दावी पनि उल्लेख्य मात्रामा पर्न थालेको छ । प्राधिकरणका एक अधिकारीका अनुसार बीमा कम्पनीहरुले पहिलो पटक निकै ठूलो मात्रामा घरजग्गा नोक्सानीको लागि रकम तिर्नु पर्ने अवस्था आएको छ । ‘विगतमा घर, जग्गा नोक्सानीको प्रेसर भूकम्पको बेलामा परेको थियो, अरु वर्ष खासै प्रेसर थिएन । यसपटक भने बाढीका कारण भएको क्षतिले पनि दबाब सृजना गरेको छ’ ती अधिकारीले भने ।
सम्पत्ति बीमा अन्तर्गत गोदाममा स्टक गरेर राखिएको मालबस्तुको बीमा दावी सबैभन्दा धेरै पर्न थालेको बीमा कम्पनीहरुको भनाई छ । पानी परेका कारण गोदाममा राखिएका बस्तुहरु पानीले डुबाउने, सड्ने र बिग्रने समस्याहरुको बीमा दावी पर्न शुरु गरेको छ ।
संख्यात्मक हिसाबले बाढी पहिरोमा परेका सवारी साधनको बीमा दावी धेरै परेको छ । अहिले नै सयौंको संख्यामा बीमा दावी परिसकेको र केही दिनभित्र त्यो निकै ठूलो संख्यामा पर्न सक्ने देखिएको बताइएको छ । किनकी बाढी पहिरोको कारण देशभर निकै धेरै सवारी साधनको नोक्सानी भएकोले त्यसको बीमा दावी पर्ने निश्चित छ ।
बीमा प्राधिकरणले बाढी पहिरोमा परेका बीमितहरुलाई आफूले बीमा गरेको सम्बन्धित कम्पनीमा सिधै फोन, इमेल वा कुनै पनि शाखा कार्यालयमा गएर बीमा दावी गर्न सकिने व्यवस्था मिलाइएको छ ।
