अमेरिकाको ग्लोबल फाइनान्स म्यागेजिनले सन् २०२४को लागि १०१ देशहरूको रिपोर्ट कार्ड सार्वजनिक गरेको छ।

जसमा तीन देशका गभर्नरले समान ‘A+’ ग्रेड पाएका छन्। जसमा डेनमार्क केन्द्रीय बैंक गभर्नर क्रिष्टियान केटेल थोमसन, भारतीय केन्द्रीय बैंकका गभर्नर शक्तिकान्त दास र स्विजरल्याण्ड केन्द्रीय बैंक गभर्नर थोमस जोर्डन छन्। उनीहरूलाई  मुद्रा स्फीति नियन्त्रण, आर्थिक विकास लक्ष्य, मुद्रा स्थिरता र ब्याजदर व्यवस्थापनमा सफलता हासिल गर्न सफल भएको कारण ‘A+’ ग्रेड दिइएको म्यागेजिनले जनाएको छ।

सबैभन्दा राम्रो प्रदर्शन गरेकोमा तीन बैंकले ग्रेड ‘A+’ पाउँदै गर्दा दुई देशले भने सबैभन्दा खराब ग्रेड प्राप्त गरेका छन्। उनीहरूले ग्रेड ‘F’ पाएका हुन्। ग्रेड ‘F’ पाउनेमा म्यानमार र भेनेजुएलाका गभर्नर परेका छन्।

नेपालका गभर्नरले भने ‘C+’ प्राप्त गरेका छन्। मुद्रास्फीति र विदेशी विनिमय सञ्चितिको दबाब कम गर्न नेपाल राष्ट्र बैंकले गत वर्ष मौद्रिक नीतिमा कडाइ गरेको थियो। उसले नीतिगत दर बढायो र कोभिड-१९ महामारीको समयमा अत्यधिक ऋण दिएका बैंकहरुलाई ऋण बिस्तारमा रोक लगायो। जसका कारण ऋण बिस्तार घट्यो। ऋण बिस्तार असाध्यै थोरै हुनु र समग्र मागमा कमी आउनुका कारण आर्थिक ग्रोथ समेत घटेको कारण अधिकारीलाई ग्रेड ‘C+’ दिइएको म्यागेजिनले जनाएको छ।  

ग्लोबल फाइनान्स म्यागेजिनका अनुसार उनीहरूले प्रदान गर्ने ग्रेड मुद्रा स्फीति नियन्त्रण, आर्थिक विकास लक्ष्य, मुद्रा स्थिरता र ब्याजदर व्यवस्थापनमा सफलता हासिल गर्नेहरूलाई ‘A+ देखि ‘F’ सम्मको ग्रेड प्रदान गर्ने गरिन्छ। ‘A+ ग्रेडलाई सबैभन्दा उत्कृष्ट प्रदर्शन र ‘F’ त्यस्तो गभर्नरलाई दिइन्छ,जो पूर्ण रुपमा असफल हुन्छन्।

म्यागेजिनका अनुसार ग्लोबल फाइनान्सको वार्षिक सेन्ट्रल बैंक रिपोर्ट कार्ड ती बैंक गभर्नरलाई सम्मान दिइन्छ जसका रणनीतिले मौलिकता, रचनात्मकता र दृढताका माध्यमबाट आफ्ना समकक्षी बैंक भन्दा राम्रो प्रदर्शन गरेका हुन्छन्।

सेन्ट्रल बैंकर रिपोर्ट कार्ड सन् १९९४ देखि अमेरिकाको ग्लोबल फाइनान्स म्यागेजिनमा हरेक वर्ष प्रकाशित गरिन्छ। यसमा १०१ देश, क्षेत्र र जिल्लाका केन्द्रीय बैंक गभर्नरलाई ग्रेड दिने गरिन्छ। यसमा युरोपीय सङ्घ, पूर्वी क्यारेबियन केन्द्रीय बैंक, केन्द्रीय अफ्रिकी राज्यका बैंक र सेन्ट्रल बैंक अफ अफ्रिकन स्टेटका बैंकहरुलाई सामेल गर्ने गरिन्छ।