आजभोली मानिसहरुलाई शेयर बजारमा लगानी गर्ने मोह बढिरहेको छ । खासगरी, बुम भएको अवस्थामा हरकोहिलाई शेयर बजारमा लगानी गर्ने चुकचुक हुन्छ ।

यसकालागि मानिसहरु तालिम तथा कक्षा संचालन गरिरहेका छन् । खासगरी, भारतमा यस्ता घटनाका खबरहरु सुनिरहेकै हुन्छौँ।

सोहि क्रममा, एक भारतीय नागरिक शेयर बजारको तालिमका नाममा ठगिएका छन् । ठगहरुले एक वृद्धलाई ६ करोड ४१ लाख भारतीय रुपैयाँ ठगेका हुन् । जुलाइ १९ मा, शेयर काराेबारकाे तालिम दिइने भन्दै ह्वाट्सएपमा मेसेज आएपछि यी वृद्ध स्क्यामका शिकार बने ।

ठगहरुले बेंगलोर बस्ने वृद्धसँग व्हाट्सएपमार्फत् सम्पर्क गरेका थिए । सोहि एपमा उनीहरुले उनलाई मेसेज गर्दै शेयर कारोबारको तालिम दिने वाचा गरेका थिए ।

भारतीय संचारमाध्यमका अनुसार पीडितसँग मीरा पटेल नामकी एक महिलाले सम्पर्क गरेकी थिइन् । ती महिलाले वृद्धसँग आफू एक ट्रेडिंग ग्रुपकाे प्रमुख सदस्य रहेकाे बताएकी थिइन् । त्यसपछि, उनले अन्य व्यक्तिहरूसँग पनि चिनजान गरिदिइन् । उनले हार्दिक शाह र आशिष गाेयल नामक एक व्यक्तिसँग वृद्धको सम्पर्क गराइन् । ती व्यक्तिहरूलाई उनले इंटरनेशनल इक्विटी फण्डका एडभाइजरका रुपमा परिचय दिएकी थिइन् ।

सुरुवातमा, ती वृद्धलाई १५ दिनकाे तालिम दिइएकाे थियाे । उक्त तालिमका क्रममा वृद्धलाई ठगहरूले शेयर बजारमा पैसा कमाउने कैयाैं तरिकाका बारेमा सिकाएका थिए । साेहि क्रममा ठगहरूले पिडितका कैयाैं कम्पनीका शेयर र आइपीओमा लगानी गर्ने दबाब दिन थाले। खासगरी, पीडितलाई ७० प्रतिशतसम्मको प्रतिफल दिने प्रलोभन दिइएको थियो । त्यसपछि, भने वृद्धको भरोसा बढेको थियो ।

प्राेफिट अनलक गर्ने नाममा उनीहरूले पीडितबाट थप पैसा लिए ।बिस्तारै पीडितसँग लगानीका नाममा उनीहरुले पैसा लिन थाले । वृद्धको खातामा उच्च प्रतिफल आएको पनि देखियो । तर सो रिटर्न नक्कली थियो । 

आफ्नाे वचत फिर्ता पाउनका लागि पिडित एकपछि अर्काे गर्दै ठगीकाे दलदलमा फस्दै गए । वृद्धले यसका लागि आफ्ना आफन्तहरूसँग समेत उधाराे र ऋण लिएका थिए ।

संचारमाध्यमहरूका अनुसार पिडितले इंटरनेशनल इक्विटी फण्ड प्लाटफर्ममा कुल ६ कराेड ४१ लाख भारतीय रूपैयाँकाे लगानी गरेका थिए । यद्धपी पछि भने उनकाे खाता लक गरिएकाे थियाे ।

तर, पीडितले पैसा निकाल्न कोशिस गर्दा उनलाई स्क्याममा फसेको थाहा भयो । त्यसपछि मात्र ती वृद्धले प्रहरीकोमा पुगी उजुरी दिएका थिए।

प्रहरीकाे अनुसन्धानमा यस ठगीमा ठगहरूले कैयाैं फाेन नम्बर, बैंक खाता र नक्कली अनलाइन पाेर्टलकाे प्रयाेग गरेकाे पाइएकाे छ । त्यस्तै, ठगहरूले पिडितलाई सेबीका नाममा नक्कली कागजातसम्मकाे प्रयाेग गरेका थिए । हाल भारतीय प्रहरीले यस विषयमा थप अनुसन्धान गरिरहेकाे छ ।