साउन महिना भनेको गत वर्षको नाफाबाट विस्तारै लाभांश घोषणा गर्दै वितरण शुरु गर्ने महिना हो । प्रायः लाभांश घोषणाको शुरुवात म्युचुअल फन्डकै योजनाहरुबाट हुने गरेको छ । म्युचुअल फन्डको लाभांश घोषणाको शुरुवातसँगै म्युचुअल फन्डको कारोबार विस्तारै बढ्न थालेको छ । कुल कारोबारको शून्य दशमलब २ प्रतिशत पनि बल्ल बल्ल हुने कारोबार अहिले बढेर शुन्य दशमलब ७३ प्रतिशतसम्म पुगेको छ। त्यसमा पनि लाभांश धेरै दिएका कम्पनीहरुको कारोबार धेरै कित्तामा हुन थालेको छ ।
मंगलबार धेरै कित्ता शेयर कारोबार हुने दश कम्पनीमध्ये ३ वटा म्युचुअल फन्डका इकाईहरु परेका छन् । सानिमा फोकस्ड इक्वीटी फन्डको इकाई ११ लाख ६२ हजार ४ सय ५० इकाई कारोबार भएको छ भने सिद्धार्थ इन्भेष्टमेन्ट ग्रोथ स्किम ३ को ५ लाख ४३ हजार ८ सय ५० इकाई कारोबार भएको छ । त्यस्तै एनएमबी सुलभ 
इन्भेष्टमेन्ट फन्ड २ को ४ लाख ६९ हजार ६ सय इकाईको कारोबार भएको छ । साधारणतया लाभांश वितरण गर्ने समयमा म्युचुअल फन्डको कारोबार बढी हुने गरेको छ । अहिले प्रायः सबै म्युचुअल फन्डको कारोबार १० रुपैयाँ भन्दा माथि नै भइरहेको छ ।
कुन म्युचुअल फन्डले कति घोषणा गरे लाभांश ?
अहिलेसम्म ओपन इन्डेड र क्लोज इन्डेड गरी १२ वटा म्युचुअल फन्डले लाभांश घोषणा गरेका छन् । त्यसमध्ये ६ वटा ओपन इन्डेड र ६ वटा क्लोज इन्डेड म्युचुअल फन्ड रहेका छन् । क्लोज इन्डेड म्युचुअल फन्डको कारोबार नेप्सेमा हुन्छ भने ओपन इन्डेड म्युचुअल फन्डको कारोबार सम्बन्धित क्यापिटलले तोकेको स्थानमा मात्रै हुन्छ । क्लोज इन्डेड म्युचुअल फन्डको निश्चित समय तोकिएको हुन्छ भने ओपन इन्डेड म्युचुअल फन्डको कुनै समय सीमा तोकिएको हुँदैन । ओपन इन्डेड म्युचुअल फन्डलाई अहिले सिस्टमेटिक इन्भेष्टमेन्ट प्लान 
(एसआइपी)को रुपमा धेरै क्यापिटलले अगाडि बढाएका छन् । ओपन इन्डेड म्युचुअल फन्डमध्ये शुभ लक्ष्मी कोषले १६ प्रतिशत, सिद्धार्थ सिस्टमेटिक इन्भेष्टमेन्ट स्किमले ८ प्रतिशत, कुमारी सुनौलो लगानी योजनाले ८ दशमलब ८८ प्रतिशत, एनआईबीएल सहभागिता फन्डले ७ प्रतिशत, एनएमबी सरल बचत फन्ड–‘इ’ले ४ दशमलब २७ प्रतिशत तथा एनआईसी एसिया डाइनामिक डेब्ट फन्डले ५ दशमलब ५५ प्रतिशत नगद लाभांश घोषणा गरेका छन् ।
ओपन इन्डेड बाहेक अहिलेसम्म लक्ष्मी सनराइज क्यापिटल, एनआईसी एसिया क्यापिटल र गरिमा क्यापिटलले सञ्चालन गरेका क्लोज इन्डेड म्युचुअल फन्डहरुले लाभांश घोषणा गरेका छन् । लक्ष्मी सनराइज क्यापिटलको सनराइज ब्लुचिप फन्डले अहिलेसम्म सबैभन्दा बढी १९ प्रतिशत लाभांश घोषणा गरेकाे छ भने त्यस्तै अर्को लक्ष्मी भ्यालु फन्ड–२ ले १५ प्रतिशत लाभांश घोषणा गरेकाे छ । गरिमा क्यापिटलले सञ्चालन गरेकाे गरिमा समृद्धि योजनाले ५ दशमलब १० प्रतिशत लाभांश दिएकाे छ ।
यता एनआईसी एसिया क्यापिटलको एनआईसी एसिया सेलेक्ट –३० ले ८ दशमलब ६५ प्रतिशत, एनआईसी एसिया फलेक्सी क्यापि फन्डले १० दशमलब १० प्रतिशत र एनआईसी एसिया ब्यालेन्स फन्डले ९ दशमलब ९० प्रतिशत लाभांश दिएका छन् ।
बुक क्लोज कहिले ?
प्रायः ओपन इन्डेड म्युचुअल फन्डले लाभांश घोषणा गर्न बोर्ड बैठक बसेकै दिनलाई बुक क्लोजको मिति तोक्ने गरेका छन् । क्लोज इन्डेड म्युचुअल फन्डमध्ये लक्ष्मी सनराइज क्यापिटलको सनराइज ब्लु चिप फन्ड र लक्ष्मी भ्यालु फन्ड–२ को लागि साउन २६ गते बुक क्लोज मिति तोकिएको छ । गरिमा क्यापिटलले सञ्चालन गरेको गरिमा समृद्धि योजनाको लागि साउन २७ गते बुक क्लोज मिति तोकिएको छ भने एनआईसी एसिया क्यापिटलले सञ्चालन गरेको एनआईसी एसिया फ्लेक्सी क्याप फन्ड, एनआईसी एसिया ब्यालेन्स फन्ड र एनआईसी एसिया सेलेक्ट फन्ड–३० को लागि साउन २९ गते बुक क्लोज मिति तोकिएको छ । बुक क्लोज भन्दा अगाडि म्युचुअल फन्डका इकाई खरिद गर्ने लगानीकर्ताले मात्रै नगद लाभांश प्राप्त गर्न सक्ने छन् ।
