लमजुङमा १२ मेगावाटको जलविद्युत आयोजना सञ्चालन गरिरहेको दोर्दी खोला जलविद्युत कम्पनी लिमिटेडको वार्षिक साधारण सभामा अवरोध आएको छ। कम्पनीले आर्थिक वर्ष २०८१/८२ को समीक्षाका लागि पुस २१ गते सोमबारका लागि तय गरेको वार्षिक साधारण सभा गणपूरक सङ्ख्या नपुगेका कारण स्थगित भएको छ। 

कम्पनीले नेपाल स्टक एक्सचेन्ज र नेपाल धितोपत्र बोर्डलाई पत्र लेख्दै सभा स्थगित भएको औपचारिक जानकारी गराएको हो।

कम्पनी ऐन २०६३ र कम्पनीको नियमावली अनुसार सभा सञ्चालन गर्न आवश्यक शेयरधनीहरूको उपस्थिति नभएपछि सभाको काम कारबाही अघि बढ्न सकेन। साधारण सभाका लागि पुस २१ गते बिहानको समय तोकिएको भए पनि गणपूरक सङ्ख्या नपुगेपछि सञ्चालक समितिले सभा स्थगित गर्ने निर्णय गरेको हो। अब कम्पनीले पुनः सूचना प्रकाशित गरी दोस्रो पटक सभा आह्वान गर्नेछ, जसमा गणपूरक सङ्ख्याको प्रावधान केही खुकुलो हुने कानुनी व्यवस्था छ ।

यस्तो छ कम्पनीको पछिल्लो वित्तीय अवस्था

साधारण सभा स्थगित भए पनि लगानीकर्ताहरू कम्पनीको पछिल्लो वित्तीय स्थिति प्रति निकै उत्सुक देखिएका छन् ।  पछिल्लो वित्तीय प्रतिवेदन अनुसार कम्पनीको चुक्ता पुँजी १ अर्ब ५ करोड ४२ लाख रुपैयाँ रहेको छ। दोर्दी खोलाले पछिल्लो समय आफ्नो विद्युत् उत्पादन र आम्दानीमा क्रमिक सुधार गरिरहेको छ। अघिल्लो आर्थिक वर्ष २०८१/८२ को अन्त्यसम्ममा कम्पनीले आफ्नो सञ्चित नोक्सानीलाई घटाउँदै नाफा तर्फको यात्रा तय गर्न थालेको छ।

कम्पनीले लमजुङको दोर्दी खोलाबाट उत्पादित बिजुली नेपाल विद्युत् प्राधिकरणलाई बिक्री गरी राम्रो आम्दानी गरिरहेको छ। यद्यपि, वर्षा याम र हिउँदको बहावमा आउने परिवर्तनले आम्दानीमा केही उतारचढाव ल्याउने गरेको छ। पछिल्लो समय जलविद्युत क्षेत्रमा बैंकको ब्याजदर घट्दै जाँदा यस कम्पनीको वित्तीय खर्चमा पनि कमी आएको छ, जसले गर्दा आगामी दिनमा शेयरधनीलाई लाभांश वितरण गर्न सक्ने क्षमतामा वृद्धि हुने प्रक्षेपण गर्न सकिन्छ।