संघले तोकेको नयाँ मूल्यअनुसार अण्डाको भाउ क्रेटमा ४० रुपैयाँसम्मले सस्तिएको छ। नयाँ मूल्य सूची अनुसार यसअघि प्रति क्रेट ४९५ रुपैयाँ पर्ने एक्स एल अण्डाको मूल्य ४० रुपैयाँले घटेर ४५५ रुपैयाँमा झरेको छ।
त्यसैगरी, ठुलो अण्डाको मूल्य क्रेटमा ३५ रुपैयाँले घटेर ४४० रुपैयाँ कायम भएको छ। जसको अघिल्लो मूल्य ४७५ रुपैयाँ थियो। मिडियम (मझौला) अण्डाको मूल्य पनि क्रेटमा ३५ रुपैयाँले नै घटेर ४४५ रुपैयाँबाट ४१० रुपैयाँमा आइपुगेको छ।
संघका अनुसार चुनावअघि अण्डाको खपत अत्यधिक बढ्दा दैनिक उत्पादनले माग धान्न अपुग भएको थियो। जसका कारण बजारमा अण्डाको भाउ महँगिएको थियो। तर, चुनाव सकिएपछि खपत घटेकाले मूल्य समायोजन गर्दै भाउ घटाइएको संघले जनाएको छ।
हाल नेपालमा दैनिक ५० लाख गोटाभन्दा बढी अण्डा उत्पादन हुने गरेको छ। संघले काठमाडौँ, धनगढी, नेपालगन्ज, दाङ, पोखरा, बागलुङ, झापा, मोरङ र सुनसरीलगायतका स्थानको वस्तुगत अवस्थाको अध्ययन र मूल्याङ्कन गरेर नयाँ भाउ घटाएर तोकेको जानकारी दिएको छ।
