ललितपुरको खुमलटारस्थित बोर्डको कार्यालयमा मङ्गलबार सम्पन्न उक्त शिष्टाचार भेटमा नेपालको पुँजी बजारलाई थप सुदृढ बनाउने उपायहरूका बारेमा विस्तृत छलफल भएको हाे ।
भेटका क्रममा पुँजी बजारको दिगो विकास, आवश्यक नीतिगत सुधारका प्रयासहरू तथा धितोपत्र बोर्डको संस्थागत क्षमता अभिवृद्धि गर्ने विषयमा दुई पक्षबीच गहन विमर्श भएको थियो । अध्यक्ष डा. भट्टले बोर्डले बजारको आधुनिकीकरण र पारदर्शीताका लागि गरिरहेका पहलहरूबारे जानकारी गराएका थिए ।
सो अवसरमा कोषका आवासीय प्रतिनिधि प्रनभकुमार गुप्ताले नेपालको पुँजी बजार सुधारका लागि बोर्डले चालेका कदमहरूको प्रशंसा गरे । उनले नेपालको वित्तीय क्षेत्रको विकासमा आईएमएफ लगायतका अन्तर्राष्ट्रिय वित्तीय संस्थाहरूको सदैव सहयोग रहने उल्लेख गर्दै आगामी दिनमा पनि नीतिगत र प्राविधिक पक्षमा निरन्तर समन्वय र प्रतिबद्धता रहने आश्वासन दिएका छन् । यस भेटबाट नेपालको धितोपत्र बजारको संस्थागत विकासमा अन्तर्राष्ट्रिय निकायहरूको थप सहयोग पुग्ने अपेक्षा गरिएको छ ।
