आयोजना स्थलमा प्राविधिक, कर्मचारी र मजदुरहरू लामो समयदेखि अलपत्र परेको भन्दै परिवारजनले थापाथलीस्थित प्रवर्द्धक कम्पनी ‘नेपाल वाटर एण्ड इनर्जी डेभलपमेन्ट कम्पनी’ (एनडब्लूईडीसी) को कार्यालयमा निरन्तर दबाब दिएपछि आज हेलिकप्टर पठाइएको हो। कम्पनी र पीडितका आफन्तबीच भएको छलफलपछि कम्पनीकै खर्चमा सरकारसँग समन्वय गरी उद्धार टोली र आफन्तलाई कार्यस्थल पठाइएको हो।
हेलिकप्टरमा आयोजनाका प्रतिनिधि र बेपत्ताका आफन्तहरू सहभागी छन्। टोलीले त्यहाँ भइरहेको खोज–उद्धार कार्यको अनुगमन गर्नुका साथै वास्तविक अवस्थाबारे जानकारी लिनेछ। बेपत्ता इन्जिनियर सचिन गौतमकी बहिनी अनुपा सापकोटाले भाइ र अन्य सहकर्मीहरूको स्थिति बुझ्न आफूहरू त्यता जान लागेको बताइन्।
आयोजनाका अनुसार हालसम्म आयोजनास्थल र आसपासका क्षेत्रबाट २५४ जनाको सकुशल उद्धार गरिएको छ। तर,अझै पनि ५७६ जनाभन्दा बढी व्यक्तिहरू सम्पर्कविहीन रहेको तथ्याङ्कले स्थिति निकै गम्भीर देखाएको छ।
६ दिन बितिसक्दा पनि प्रभावकारी उद्धार हुन नसकेको भन्दै आफन्तहरू आक्रोशित छन्।
भीर र सुरुङभित्र फसेकाहरूले खाना र पानीसमेत नपाएको हुनसक्ने र उनीहरूको ज्यान जोखिममा रहेको भन्दै परिवारजनले तत्काल सबैको उद्धार गर्न माग गरेका छन्। सडक मार्ग पूर्ण रूपमा अवरुद्ध रहेकाले हवाई उद्धार नै अहिलेको एकमात्र विकल्प बनेको छ।
