सरकारले कृषिमा रहेको बजेट वृद्वि गरे पनि सोहीअनुसार खर्च हुन नसक्नु दुखद भएको भन्दै केन्द्रीय बैंकका गभर्नर डा. चिरञ्जीवी नेपालले युवा जनशक्तिलाई कृषि पेशामै केन्द्रीत गर्ने गरी सरकारी कार्ययोजनाहरु आउने र युवाहरुलाई कृषिमै लाग्न प्रेरित गर्ने नीति राष्ट्र बैकको रहने बताएका छन् ।

‘कृषि विकासका लागि सञ्चार अभियान’ विषयक कार्यक्रममा गर्भनर नेपालले कृषि व्यवसाय सञ्चालन गर्न बैंकले ऋण दिन तयार नभए ४४११२५० मा फोन गर्न आग्रह गरेका छन् ।

यो फोन नम्बर राष्ट्र बैंकको हटलाइन हो । उनले पश्चिमका विकट १० जिल्ला र मध्य तराईका गरिबी रहेका १ सय १४ गाविस र ३ नगरपालिकामा कृषि कर्जाका लागि विशेष सहुलियतको व्यवस्था गरेको बताए ।

कृषि पेशालाई अब्बल दर्जाको पेशाको रुपमा रुपान्तरण गर्न आवश्यक भएको भन्दै उनले भने, ‘कृषि कर्जा नपाएका किसानहरु नेपाल राष्ट्र बैंकको केन्द्रीय कार्यालयमा आउन सक्ने र उक्त कार्यालयको हटलाईन नम्बरमा सम्पर्क गर्नुहोस् ।’

यस्तै दुर्गम जिल्लाका बाटो नपुगेका स्थानका १० लाख रुपैयाँ ऋण दिने, विकट जिल्लाका किसानलाई १ प्रतिशत र उत्पादनमुखी कृषि, पशुपक्षीपालनमा लागेका किसानहरुलाई चार प्रतिशतमा पुर्नकर्जा दिने निती आईसकेकोले किसानहरुले उक्त सेवाबाट फाईदा लिन सुझाव दिए । ‘क्षेत्र नै तोकेर राष्ट्र बैंकले चालू आर्थिक वर्षको मौद्रिक नीतिमार्फत कृषि क्षेत्रमा ऋण प्रवाह गर्न बैंक तथा वित्तीय संस्थाहरुलाई प्रोत्साहन गर्ने उद्देश्यले १ प्रतिशतमा पुनकर्जा उपलब्ध गराउने व्यवस्था गरेको छ ।’ उनले भने ।

सो अवसरमा कृषिमन्त्री हरिबोल गजुरेलले मुलुक कृषिप्रधान देश हुँदाहुँदै पनि कृषिमा बढिरहेको परनिर्भरतालाई अन्त्य गर्न यस क्षेत्रमा श्रमशक्ति परिचालन गर्न चुनौतीपूर्ण रहेको बताए । सो अवसरमा कृषिमन्त्री गजुरेलले भने, ‘मुलुकमा कृषि उत्पादनमाथि भईरहेको परनिर्भरताका कारण राष्ट्रिय स्वाधिनतामै आँच आएको छ, यसलाई बदल्नका लागि युवा तथा श्रमशक्तिलाई मुलुकमै परिचालन गर्नु अत्यावश्यक छ ।’ हालै मन्त्रालयले जारी रहेको २७ बुँदे कृषि प्रतिबद्वताको दुई तिहाई कार्ययोजनाहरु कार्यान्वयन गर्ने प्रतिबद्वता जनाउदै उनले आगामी दुई वर्षमा कृषिलाई आत्मनिर्भर बनाउने दाबी गरे ।

पाँच कृषि पत्रकारलाई पुरस्कार प्रदान

नेपाल कृषि पत्रकार प्रतिष्ठान (जोना) ले कृषि विकास बहुउद्देश्यीय सहकारी लिको सहकार्यमा यो बर्ष पनि पाँच जना पत्रकारहरुलाई पुरस्कृत गरेको छ । विभिन्न जिल्लाका तीन र राजधानीका दुई कृषि पत्रकारलाई प्रतिव्यक्ति नगद दश हजार रुपैयाँ र सम्मान पत्र प्रदान गरेका गरेको हो । सम्मानीत हुनेमा विबिसि नेपाली सेवाका सुभाष कार्की, राजधानी दैनिककी लक्ष्मी सापकोटा, गोरखापत्र (कालिकोट) का विष्णु न्यौपाने, नयाँ पत्रिकाका इलामका ख्यामप्रसाद भूजेल र कान्तिपुर दैनिक (दैलेख) का प्रकाश अधिकारी रहेका छन् ।

.................................................................................................................................................................

तपाईको एण्ड्रोइड ग्याजेटमा गुगल प्ले स्टोरबाट मेरो लगानी को एप्स डाउनलोड गर्न यहाँ थिच्नुहोस् । तपाईँ मेरो लगानीका प्रत्येक अपडेट फेसबुक र ट्वीटर मार्फत पनि पाउन सक्नुहुन्छ ।