पाकिस्तानको अर्थव्यवस्था हरेक दिन संकटमा फस्दै गइरहेको छ । अमेरिकी डलरको तुलनामा पाकिस्तानको रूपैयाँ बुधबार इन्टर बैंकिङ ट्रेडमा १६४ सम्म पुगेको छ । अर्कातर्फ खुला बजारमा पनि पाकिस्तानी रूपैयाँ १६० भन्दा बढी पुगेको छ ।

बुधबार पाकिस्तानी रूपैयाँ एक डलरको तुलनामा ७.२ रूपैयाँले कमजोर भयो । योसँगै पाकिस्तानी रूपैयाँ ऐतिहासिक रूपमा सबैभन्दा तल्लो स्तरमा पुगेको छ ।पाकिस्तानको अर्थव्यवस्था पहिलेदेखि नै संकटबाट जेलिएको छ । यस्तो अवस्थामा रूपैयाँमा जारी गिरावटले झनै संकटको स्थिति बढेको बताइएको छ ।

पाकिस्तानमा यसै हप्ता सुनको मूल्यमा पनि भारी वृद्धि भयो । बुधबार पाकिस्तानमा १२ ग्राम सुनको मूल्य ८० हजार ५ सय पाकिस्तानी रूपैयाँमा कारोबार भएको थियो । पाकिस्तानको विदेशी मुद्रा भण्डार पनि ७ अर्ब ६० करोड डलरमा झरेर सबैभन्दा तल्लो स्तरमा पुग्यो ।

गत हप्ता स्टेट बैंक अफ पाकिस्तान (एसबीपी) का गभर्नर डा. रजा बकीरले भनेका थिए, रूपैयाँमा भएको यस्तो गिरावट केही दिनका लागि मात्रै हो ।

पाकिस्तानमा ३ जूनदेखि रूपैयाँमा गिरावटको अवस्था आइरहेको छ र हालसम्म पाकिस्तानी रूपैयाँ ९ प्रतिशतले कमजोर भइसकेको छ ।

पाकिस्तानको चालु आर्थिक वर्ष ३० जूनमा समाप्त हुँदैछ । धेरै कम्पनीहरूले ३० जून अगाडि नै आफ्ना सबै अन्तर्राष्ट्रिय भुक्तानी गर्नुपर्ने हुन्छ । त्यसका लागि उनीहरूलाई डलर आवश्यक पर्दछ । त्यसैले रूपैयाँमा गिरावटको अवस्था देखिएको रजा बकिरले बताए ।

इमरान खान प्रधानमन्त्री बनेपछि १० महिनाको अवधिमा पाकिस्तानी रूपैयाँमा २९ प्रतिशतले गिरावट आएको बताइएको छ । गत वर्ष १८ अगस्टमा पाकिस्तानी रूपैयाँ १२३.३५ थियो । जुन २६ मे २०१९ मा १६० भन्दा बढी भयो ।

पाकिस्तानको इतिहासमा यति छोटो समयमा यति धेरै गिरावट पहिलो पटक भएको हो । अन्तर्राष्ट्रिय मुद्रा कोष (आईएमएफ) सँग ६ अर्ब डलरको ऋण सम्झौतालाई मध्यनजर गर्दै पाकिस्तानको ?पैयाँ अझै कमजोर हुने आशंका गरिएको छ । एजेन्सी