चालु आर्थिक बर्षको बजेटमा उल्लेख भए अनुसार सरकारले नेपाल खाद्य संस्थान र नेसनल ट्रेडिङ लिमिटेडलाई आपसमा गाँभेर नयाँ व्यापार कम्पनी स्थापना गर्न लागेको हो ।
पूर्ण रुपमा सरकारी स्वामीत्व रहने उक्त कम्पनीमा अहिले सञ्चालन भइरहेका भाटभटेनीमा जस्तै सामान बिक्री गरिने जनाइएको छ ।
सरकारले चालू आर्थिक वर्षको बजेटमा नै खाद्यसंस्थान र ट्रेडिङलाई मिलाएर नयाँ कम्पनी स्थापना गरिने व्यवस्था गरेकोे थियो । सोहि अनुसार मन्त्रिपरिषद्को माघ १० गते र गत जेठ १४ गतेको बैठकले दुई कम्पनीलाई गाभेर नयाँ ब्यापार कम्पनी स्थापना गर्ने निर्णय गरेको थियो ।
उद्योग, वाणिज्य तथा आपूर्ति मन्त्रालयले दुई कम्पनीलाई गाभेर नयाँ व्यापार कम्पनी‘ खाद्य व्यवस्था तथा व्यापार कम्पनी लिमिटेड’ स्थापनाको लागि दर्ता प्रकृया अघि बढाएको बताइएको छ । दुई कम्पनी गाभिएर बन्ने ‘खाद्य व्यवस्था तथा व्यापार कम्पनी लिमिटेड’ को नाम कम्पनी रजिष्ट्रारको कार्यलयबाट स्वीकृत भइसकेको छ ।
दुइ कम्पनी गाभिएर बन्ने नयाँ कम्पनीको अधिकृत पूँजी ३० अर्ब, जारी पूँजी २० अर्ब र चुक्तापूँजी १ अर्ब १५ करोड ९३ लाख रुपैयाँ हुनेछ ।
