नयाँ शेयर रजिष्ट्रार चयन गर्नेमा सबैको लघुवित्त, आँधिखोला लघुवित्त,घाेडीघाेडा लघुवित्त, रसुवागढी हाइड्रोपावर र मुक्तिनाथ विकास बैंक रहेका छन् ।
आँधिखोला लघुवित्त र सबैको लघुवित्तले एनआईबिएल एस क्यापिटल लिमिटेडलाई शेयर रजिष्ट्रार चयन गरेका छन् ।
आँधिखोला लघुवित्त वित्तीय संस्थाले असार २२ देखि २५ गतेसम्म ४ लाख कित्ता आइपीओ निष्काशन गरेको थियो । आईपीओ बाँडफाँड पश्चात लघुवित्तको चुक्ता पूँजी १० करोड रुपैयाँ पुगेको छ । त्यस्तै सबैको लघुवित्तले साउन १ देखि ५ गतेसम्म ५ लाख ३० हजार कित्ता आईपीओ निष्कासन गरी बाँडफाँड गरिसकेको छ ।
त्यस्तै घोडिघोडा लघुवित्तले प्रभु क्यापिटललाई शेयर रजिष्ट्रार चयन गरेको छ । घोडीघोडा लघुवित्तले १ करोड ३२ लाख ६० हजार बराबरको १ लाख ३२ हजार ६ सय कित्ता शेयर निष्काशन गरी बाँडफाँड गरिसकेको छ ।
हालसम्म घोडिघोडा लघुवित्त, आँधिखोला लघुवित्त र सबैको लघुवित्तको शेयर नेप्सेमा सूचीकरण भने भएको छैन ।
त्यसैगरी मंगलबारबाट मात्र दोस्रो बजारमा शेयर कारोबार खुलेको रसुवागढी हाइड्रोपावरले सिद्धार्थ क्यापिटललाई शेयर रजिष्ट्रार चयन गरेको छ । हाइड्रोपावरले झण्डै साढे ३ महिना अघि ९३ लाख ३९ हजार ४६७ कित्ता आइपीओ बिक्री गरेको थियो जुन गत सोमबार नेप्सेमा सूचीकृत भइसकेको छ ।
यता मुक्तिनाथ विकास बैंकले पनि शेयर सम्बन्धि अभिलेख राख्न भिबोर क्यापिटल लिमिटेडलाई शेयर रजिष्ट्रार चयन गरेको छ ।
