साउदीले सन् २०३० सम्म वार्षिक १० करोड आन्तरिक र बाह्य पर्यटकको लक्ष्यसहित उक्त योजना अघि सारेको हो ।
अर्थतन्त्रमा तेलको निर्भरता कम गर्न साउदीले पर्यटन क्षेत्रलाई बढावा दिने योजना अघि बढाएको हो । साउदीले पर्यटनलाई आयको नयाँ माध्यम बनाउन चाहेको बताइएको छ ।
साउदीले ४९ मुलुकलाई भ्रमणको अनुमति दिँदै महिला पर्यटकको पोशाकका लागि पनि केही लचिलो नीति अपनाउने निर्णय गरेको हो । यि देशका नागरिकहरुका लागि अनलाइन टूरिस्ट भिसा आवेदन सुरु गरिने बताइएको छ ।
योभन्दा पहिले साउदीले केबल विदेशबाट जागिरका लागि जाने कामदार, उनीहरुका परिवारजन र मक्का मदिना जाने मुस्लिम तीर्थयात्रीहरुका लागि भिसा जारी गर्दै आएको थियो ।
साउदीका पर्यटनमन्त्री अहमद अल–खातीबले हालको यो निर्णय मुलुकका लागि ऐतिहासिक क्षण रहेको बताए । साउदीले आगामी दिनमा पर्यटन क्षेत्रमा विदेशी लगानी पनि बढ्न सक्ने अनुमान गरेको छ ।
योसँगै अब साउदीमा विदेशी महिला पर्यटकले पूरा शरीर ढाक्ने कपडा लगाउनु जरुरी हुने छैन । तर उनीहरूले भड्किलो खालको कपडा भने लगाउन पाउने छैनन् । मदिरा माथिको प्रतिबन्ध भने जारी नै रहने बताइएको छ । एजेन्सी