अमेरिकी श्रम मन्त्रालयले सार्वजनिक गरेको तथ्यांकअनुसार गत महिना २ लाख ६६ हजार रोजगारी सिर्जना भएको छ । यस अवधिमा बेरोजगारी दर ३.६ प्रतिशतबाट घटेर ३.५ प्रतिशतमा झरेको छ । सो अवधिमा १ लाख ८० हजार मात्रै रोजगारी सृजना हुन सक्ने विश्लेषण गरिएको थियो ।
अमेरिकी अटो निर्माता कम्पनी जनरल मोटर्स (जीएम) मा हड्ताल गरिरहेका कर्मचारीहरू काममा फर्किएपछि रोजगारी वृद्धिमा सहयोग पुगेको बताइएको छ ।
चीनसँग जारी व्यापार युद्धले अमेरिकामा व्यावसायिक मनोबल र लगानी प्रभावित हुने डर रहेपनि अमेरिकी अर्थतन्त्रले निरन्तर सुधारको गति लिइरहेको छ ।
चाल्स स्वाबका प्रबन्ध निर्देशक रिचार्ड फ्लिनले रोजगारी तथ्यांक अपेक्षाभन्दा निकै धेरै भएको बताए । रिचार्डले भने, विश्व अर्थतन्त्र सुस्ताइरहेको बेला व्यापार अनिश्चय पनि कायमै छ । तर पछिल्लो रोजगारी तथ्यांकले भने श्रम बजार र उपभोक्ता मनोबल दुवै सुदृढ भएको देखाएको छ ।
यस अवधिमा पार्ट–टाइम काम गर्नेको संख्या ४३ लाख २० हजारमा आएको छ । यो ३० वर्षको औसतभन्दा कम हो ।
गत वर्षको सोही अवधिको तुलनामा तलब वृद्धि ३.१ प्रतिशतले बढेको छ । रोजगारी सृजना अप्रत्याशीत रहेपनि संशोधित तथ्यांकमा भने घटेर आउन सक्ने बताइएको छ । एजेन्सी
