शेयर बजारमा बिक्रीभन्दा खरिद चाप बढ्दा अधिकाँश कम्पनीको शेयरमूल्य बढेको छ। कारोबारमा आएका १२ वटा उपसमुहमध्ये होटल उपसमुहको सूचक सबैभन्दा धेरै ८.८८ प्रतिशतले बढेको छ भने निर्जीवन बीमा कम्पनी उपसमुहको सूचक पनि ६ प्रतिशतभन्दा धेरैले बढेको छ।
मंगलबार दिन १७८ वटा कम्पनीको २८ लाख ८३ हजार कित्ता शेयर १ अर्ब २१ करोड रुपैयाँमा खरिद बिक्री भएको छ। यस दिन नेपाल पुनर्बीमा कम्पनीको सबैभन्दा धेरै ९ करोड १२ लाख रुपैयाँ बराबरको शेयर कारोबार भएको छ भने नेपाल लाइफ इन्स्योरेन्सको ८ करोड ६० लाख, हिमालयन डिस्टिलरीको ५ करोड ८६ लाख, एनएमबि बैंकको ५ करोड ९ लाख र छिमेक लघुवित्तको ४ करोड २४ लाख रुपैयाँको शेयर कारोबार भएको छ।
यस दिन २३ वटा कम्पनीको शेयरमूल्य ९ प्रतिशतभन्दा धेरैले बढेको छ। जसमा प्रुडेन्सीयल इन्स्योरेन्स,ओरियन्टल होटल,नेपाल सेवा लघुवित्त, नेपाल पुनर्बीमा कम्पनी र मञ्जुश्री फाइनान्सको शेयरमूल्य १० प्रतिशतले बढेको छ।
कारोबारमा आएका कम्पनीहरुमध्ये १४ वटा कम्पनीको शेयरमूल्य सामान्य घटेको छ। खनिखोला हाइड्रोपावरको शेयरमूल्य सबैभन्दा धेरै ३.८४ प्रतिशतले घटेको छ भने ग्लोबल आइएमई लघुवित्तको ३.७१ प्रतिशत, घलेम्दी हाइड्रोपावरको ३.४४ प्रतिशत र रिलायन्स फाइनान्सको ३.०७ प्रतिशतले घटेको छ। कारोबारमा आएका कम्पनीहरुमध्ये ८ वटा कम्पनीको शेयरमूल्य भने परिवर्तन भएको छैन।
मंगलबार नेप्से सूचक ३७.९३ अंकले बढेर १३३६.६६ विन्दुमा पुगेको छ भने सेन्सेटिभ सूचक ६.७१ अंकले बढेर २८२.५९ विन्दुमा पुगेको छ।