अन्य देशको आकाशमा इन्टरनेट सुविधा भएपनि नेपालका आकाशमा भने यो सुविधा थिएन । अब भने विदशी एयरलाइन्सका यात्रुले यस्तो सुविधा लिन सक्ने छन ।
हालै नेपाली आकाशमा इन्टरनेट सेवा उपलब्ध गराउन दुई ओटा कम्पनीले प्राधिकरणबाट स्वीकृती पाएका छन् । केहि महिना भित्रै यी कम्पनीले सेवा सुरु गर्ने प्राधिकरणले जनाएको छ ।
अनुमति दिइएका दुई कम्पनीमा सीता फर एयरक्राफ्ट र थालस नामका कम्पनी रहेका छन् ।
‘अहिलेसम्म सीता फर एयरक्राफ्ट र थालस कम्पनीले इन्टरनेट प्रयोग गर्न स्वीकृति पाएका छन्,’ प्राधिकरण निर्देशक अम्बर स्थापितले भने,‘ती कम्पनीले केहि समय अघि मात्रै अनुमति पाएका हुन ।’
अब यी कम्पनीले नेपाल भित्रको फ्रिक्वेन्सी प्रयोग गरी विदेशी हवाइ यात्रुलाई दशहजार फिट माथि पनि इन्टरनेट सेवा दिने जनाइएको छ ।
प्राधिकरणले गत फागुनमा नेपाली आकाशमा इन्टरनेट सेवा दिने घोषणा गरेको थियो । चैतमा निवेदन दिएका यी कम्पनीले लगत्तै अनुमाति पाएका थिए । इन्टरनेट सेवा उपलब्ध गराउन अन्य कम्पनीले भने आवेदन दिएनन् ।
प्राधिकरणले आईकाओ सम्बन्धि सन्धि तथा दूरसंचार ऐन २०५३ को व्यवस्था बमोजिम दशहजार फिट माथिको नेपाली आकाशमा विदेशी एरलाइन्सहरुले पनि दूरसंचार सेवा प्रदान गर्न २ कम्पनीलाई अनुमति दिएको हो ।
अब नेपाली आकाशमा उड्ने विदेशी एयरलाइन्स कम्पनीले इन्टरनेट सेवा उपलब्ध गराउन यी दुइ सेवाप्रदायकसँगै समन्वय गर्ने छन्। सोहि अनुसार सेवा प्रदायकले प्रक्रिया अघि बढाउने प्राधिकरणले जनाएको छ ।
अनुमति पाएका यी कम्पनीले इन्टरनेटसँगै टेलिफोन सेवा पनि उपलब्ध गराउने जनाइएको छ ।