काँग्रेसका प्रवक्ता विश्वप्रकाश शर्माद्वारा महामन्त्रीमा उम्मेदवारी दिने घोषणा

Sep 09, 2021 05:37 PM merolagani

नेपाली काँग्रेसका प्रवक्ता विश्वप्रकाश शर्माले पार्टीको आगामी महाधिवेशनमा महामन्त्रीमा उम्मेदवारी दिने घोषणा गरेकाे छन् । पार्टीका संस्थापक नेता विपी कोइरालाको जन्मजयन्तिको अवसरमा बिहीबार सुन्दरीजल पुगेका प्रवक्ता शर्माले पार्टीको आगामी महाधिवेशनमा महामन्त्रीमा उम्मेदवारी दिने घोषणा गरेका हुन्।

तीन वटा निर्वाचन लगातार जितेर १५ वर्षमा देश बनाउने विपी कोेईरालाको परिकल्पनालाई सम्बोधन गर्न पनि आफूले पार्टी भित्रका सबै नेता र कार्यकर्ताको साथ, सहयोग र समर्थन पाएर पार्टीको महामन्त्रीमा उम्मेदवारी दिने योजना बनाएको उनले स्पष्ट पारे । प्रवक्ता शर्माले एउटा निर्वाचन जित्ने अर्को निर्वाचन हार्ने निरन्तरको श्रृखंला काँग्रेसको रहेको स्मरण गराउँदै त्यसले देश नबन्ने र त्यसको भागीदार काँग्रेस हुनुपर्ने अवस्था आउन नदिन पनि आफूले पार्टीलाई महामन्त्रीको जिम्मेवारीमा रहेर हाँक्ने चाहेको पनि बताए । 

प्रवक्ता शर्माले मुलुकलाई निर्माण गर्ने गरी साझा दृष्टिकोणका साथ अघि बढन पनि सिंगो पार्टी पंक्तिलाई आह्वान गरे । कम्युनिष्टहरुलाई गाली गरेर होईन् नेपाली जनतामा विद्यमान रोग र भोकको समस्या समाधान गरेर काँग्रेस अघि बढनुपर्नेमा उनको जोड छ ।

नेपाली काँग्रेसको १४ औं महाधिवेशन आगामी मंसीर ९ गतेबाट काठमाडौंमा सुरु हुँदैछ । काँग्रेस युवा नेता गगन थापाले सोही महाधिवेशनमा महामन्त्रीका लागि उम्मेदवारी दिने घोषणा गरिसकेका छन् । काँग्रेसको बिधानमा २ जना महामन्त्री हुने व्यवस्था गरिएको छ । काँग्रेस वृतमा महामन्त्रीका लागि युवा नेता प्रदीप पौडेलले पनि उम्मेदवारी दिने चर्चा छ ।

comments powered by Disqus