अर्थमन्त्री र गभर्नर आमने सामने, १२ करोड ‘क्याप’ का सम्बन्धमा गभर्नर भन्छन्,‘छुट्टै पत्रकार सम्मेलन गरेर जानकारी गराउला’

Sep 12, 2021 05:13 PM Merolagani

अर्थमन्त्री जनार्दन शर्मा र नेपाल राष्ट्र बैंकका गभर्नर महाप्रसाद अधिकारीबीच आमने सामने भेट भएको छ । तर, उक्त भेटमा एक व्यक्तिलाई शेयर धितोकर्जा राखेर १२ कारोड भन्दा बढी ऋण नदिने बिषयमा भने उनीहरुले कुनै प्रतिक्रिया जनाएनन् ।

अर्थमन्त्री शर्माले गत शुक्रबार संसदमा पेश गरेको अर्थ सम्बन्धी अध्यादेशहरुलाई प्रतिस्थापन गर्ने विधेयकहरुको सन्दर्भमा जानकारी दिन अर्थमन्त्रालयको सभाहलमा आयोजित पत्रकार सम्मेलनमा गभर्नर पनि सहभागी भएका थिए । त्यहा उनीहरुबीच भेट भएको थियो । तर, गभर्नरले १२ कराेडका सम्बन्धमा राष्ट्र बैंकले आयाेजना गरेकाे पत्रकार सम्मेलनमा जानकारी गराउने बताए ।

अर्थमन्त्रीले केही दिन पहिला टेलिफोनमार्फत गभर्नरलाई १२ करोडको सीमालाई व्यवस्थापन गर्न निर्देशन दिएका थिए । तर, गभर्नरले त्यसबारेमा अहिलेसम्म कुनै प्रतिक्रिया जनाएका छैनन् । राष्ट्र बैंकले भने आगामी मौद्रिक नीतिको पहिलो त्रैमासिक समिक्षामा मात्रै उक्त बिषयमा कुनै परिवर्तन गर्न वा नगर्न पनि सकिने प्रतिक्रिया दिँदै आएको छ ।

मौद्रिक नीति मार्फत १२ करोडको क्याप लगाएरपछि शेयर बजार निरन्तर ओरालो लाग्दै गएपछि अर्थमन्त्रीले शेयर बजारलाई थामथुम पार्न गभर्नर टेलिफोन गरेको कुरा बाहिर आएको थियो । राष्ट्र बैंकले साउन २९ गते ल्याएको मौद्रिक नीतिमा एक व्यक्तिले एक बैंकबाट ४ करोड र बढीमा ३ बैंकबाट १२ करोड भन्दा बढी शेयर धितोकर्तामा ऋण नदिने व्यवस्थालाई कार्यान्वयन गर्न बैंक तथा वित्तीय संस्थालाई निर्देशन दिइसकेको छ ।

गभर्नरले १२ करोडका बारेमा केही नबोले पनि उक्त पत्रकार सम्मेलनमा अर्थमन्त्रीले भने शेयर बजारका ४२ लाख लगानीकर्ताको लगानी रक्षा गर्नु पर्ने बताए ।

comments powered by Disqus