कम्पनी सञ्चालक समितिको साउन ११ गते बसेको बैठकले भदौ १० गते शुक्रबार बिहान १० बजे, कम्पनीको रजिष्टर्ड कार्यालय नक्सालमा पहिलो वार्षिक साधारण सभा बोलाएको छ ।
सभाले सर्वसाधारणलाई आईपीओ निष्काशन गर्ने विशेष प्रस्ताव पारित गर्नेछ । यस्तै कम्पनीले पूँजी वृद्धि गर्ने सम्बन्धमा हकप्रद शेयर निष्काशन गर्ने तथा गाभ्ने गाभिने तथा प्राप्ति सम्बन्धी प्रस्ताव समेत पारित गर्नेछ ।
यस्तै कम्पनीले विदेशी लगानी भित्राउन कम्पनीको प्रबन्धपत्रमा उदेश्य थप तथा संशोधन गर्ने तयारी समेत गरेको छ ।
पुनर्बीमा ब्रोकर के हो?
पुनर्बीमा कम्पनी र बीमा कम्पनीहरुबीचमा मध्यस्थताको कार्य गर्ने कम्पनी नै पुनर्बीमा ब्रोकर हो । पुनर्बीमा ब्रोकरले पुनर्बीमा दाबी भुक्तानीमा सहजीकरण गर्ने, पुनर्बीमा सम्झौता तयार गर्न सहयोग गर्ने, पुनर्बीमा सम्झौता अनुरुपको लिने-दिने रकमको हिसाब फरफारक गर्न सहयोग गर्ने लगायतको काम गर्नेछ ।
यस्तै ब्रोकरले पुनर्बीमा विशेषज्ञता सेवा र प्राविधिक परामर्श दिने, बीमा÷ पुनर्बीमा बजारको तथ्यांक विश्लेषण गरी पुनर्बीमित र पुनर्बीमकलाई उपलब्ध गराउनेछ । जोखिम अनुसार उपयुक्त पुनर्बीमा व्यवस्था गर्न पनि ब्रोकरले सहयोग गर्नेछ ।
