नागरिक उडड्यन प्राधिकरणले नेपाल वायुसेवा निगम (एनएसी)लाई मागेको उडान तालिका बमोजिम अनुमति नदिँदा निगमनको आम्दानीमा संकुचन आएको छ । 

निगमले गत सेप्टेम्बर १५ मा दिल्लीका लागि १४, दोहा, मलेशिया र दुबईका लागि ०७÷०७ र रियादको लागि ०६, मुम्बई, बैंग्लोर, हङकङ, बैंकक र नारिताको ०३–०३ गरी प्रतिहप्ता जम्मा ५६ वटा उडान तालिका उड्डयन प्राधिकरणमा स्वीकतिको पेस गरेको थियो । प्राधिकरणले गत अक्टोबर २३ मा निगमलाई प्रतिहप्ता ४२ वटा मात्र उडान स्वीकृति दिएको छ । निगमले हप्तामा ५६ वटा उडानको तालिका प्रस्तुत गरेकोमा १४ वटा उडान कटौती गरी ४२ वटा उडानको मात्रै स्वीकृति दिएको हो ।

निगमले हिस्टोरिकल स्लटको रुपमा सञ्चालन हुँदै आएको काठमाडौं–दिल्ली–काठमाडौं सेक्टरको साप्तहिक १४ उडानमध्ये १० वटा उडान मात्र स्वीकृत भएकाले निगमको आम्दानीमा व्यापक संकुचन आएको निगमले जनाएको छ । काठमाडौं दिल्ली सेक्टर निगमको सबैभन्दा धेरै आम्दानी हुने रुट भए पनि प्राधिकरणले निगमको उडान कटौती गरेर भारतीय एयरलायन्स कम्पनीहरुलाई रुट प्रदान गरेको हो । निगमले आफ्ना यात्रुहरुलाई रिरुटिङ गरेर पठाउँदा थप अतिरिक्त लगतको भार थपिएको समेत जनाएको छ ।

नेपाल वायुसेवा निगमले अन्तर्राष्ट्रिय उडानतर्फ हाल विभिन्न १० वटा गन्तव्यहरुमा उडान सञ्चालन गर्दै आएको छ । उक्त गन्तव्यहरुमध्ये भारतको नयाँ दिल्लीमा विगत लामो समयदेखि निगमले नियमित रुपमा दैनिक दुुईवटा उडान सञ्चालन गर्दै आएको छ । उक्त उडान निगमको व्यवसायिक दृष्टिकोणले मात्र महत्वपूर्ण नभई नेपालीहरुलाई स्वास्थ्य उपचार, उच्च शिक्षा आर्जन, व्यवसाय प्रवद्र्धन तथा अन्य मुलुक प्रस्थानको लागि समेत महत्वपूर्ण गन्तव्यको रुपमा रहेको हवाई क्षेत्रका विज्ञहरु बताउँछन् ।

उड्डयन प्राधिकरणले भने निगम व्यवस्थापनलाई काठमाडौं दिल्लीतर्फ कटौती भएको ४ उडान गौतम बुद्ध अन्तर्राष्ट्रिय विमानस्थलबाट गर्न निर्देशन दिएको छ । सोही निर्देशन बमोजिम निगम व्यवसथापनले काठमाडौं–दिल्ली–भैरहवा–काठमाडौं उडानको स्वीकृतिको लागि प्राधिकरण पठाएको जनाएको छ ।