सहभागि राष्ट्रहरुलाई दुई समूहमा विभाजन गरिएको छ। पहिलो समूहमा नेपाल, सिंगापुर, ओमान र मलेसिया रहेका छन् भने दोस्रो समूहमा यूएई, बहराइन, हङकङ चाइना र कुवेत रहेका छन्।
नेपाल क्रिकेट संघ (क्यान) ले सार्वजनिक गरेको तालिका अनुसार आज ४ खेल हुनेछन्। बिहान ९ बजे शुरु हुने खेलमा नेपालले सिंगापुरको सामना गर्नेछ भने यूएईले बहराइनको सामना गर्नेछ।
त्यसैगरी, दिउसो सवा १ बजे ओमान विरुद्ध मलेसिया र हङकङ विरुद्ध कुवेतको खेल हुनेछ। त्रिवि क्रिकेट ग्राउण्डमा नेपाल–सिंगापुर र ओमान–मलेसिया बीचको खेल हुनेछ भने बाँकी दुई खेल मुलपानी ग्राउण्डमा हुनेछ।
समूहचरणको अन्य दुई खेलमा नेपालले कात्तिक १४ गते मलेसिया र कात्तिक १६ गते ओमानसँग खेल्नेछ।
समूहचरणमा जितेका दुई–दुई टीमहरु बीच कात्तिक १७ गते दुईवटा सेमिफाइनल खेल हुनेछ। सो सेमिफाइनल खेलका विजेताहरुले कात्तिक १९ गते आइतबार फाइनल खेल खेल्नेछन्।
फाइनलमा पुग्ने दुई टोलीले अर्को वर्ष अमेरिका र वेस्ट इन्डिजमा आयोजना हुने टी २० विश्वकप खेल्न पाउनेछन्।
यस प्रतियोगितामा नेपाल रोहित पौडेलको कप्तानीमा मैदानमा उत्रिनेछ। नेपालको टोलीमा कुशल भुर्टेल, आशिफ शेख, कुशल मल्ल, दीपेन्द्र ऐरे, सन्दिप जोरा, गुल्शन झा, सोमपाल कामी, करण केसी, अविनाश बोहोरा, प्रतिश जीसी, विवेक यादव, सन्दिप लामिछाने, ललित राजवंशी र विनोद भण्डारी रहेका छन्।
