निगमका अनुसार वाइडबडी जहाज खरिदका लागि नेपाल सरकारको जमानतमा नागरिक लगानीकोषले १२ अर्बको ऋण सम्झौता गरेको हो । कोषले पन्ध्र वर्षका लागि नौ प्रतिशत ब्याजदरमा १२ अर्ब रुपैयाँ नेपाल वायुसेवा निगमलाई ऋण दिने भएको हो ।
निगमले आइतबार मात्रै कर्मचारी सञ्चयकोषसँग पनि ऋण प्रवाह सम्झौता गरेको थियो । कर्मचारी सञ्चयकोषले पनि निगमलाई १२ अर्ब रुपैयाँ नै ऋण लगानी गर्ने भएको छ ।
निगमले २०७५ जेठभित्र दुईवटा वाइडबडी जहाज खरिदका लागि अमेरिकन लिजिङ कम्पनी एएआर कर्पोरेसनसँग खरिद सम्झौता गरिसकेको छ । निगमले खरिद सम्झौता सँगसँगै पहिलो किस्ताबापतको करिब ३५ प्रतिशत रकम यही महिनाभित्र भुक्तान गर्दैछ ।
निगमले ल्याउने जहाज २८० सिट क्षमताको हुनेछ । वाइडबडी जहाज आएसँगै युरोप र अमेरिकामा पनि सिधै उडान गर्ने योजना निगमले बताएको छ । निगमसँग अहिले अन्तर्रा्ष्ट्रिय उडानका लागि दुईवटा न्यारोबडी जहाज र एउटा बोइङ छ ।
