बिहीबार कारोबार सुरु भएको एक घण्टासम्म अलमलमा रहेका लगानीकर्ता स्थायी रुपमै बजारले वृद्धिको संकेत देखिएपछि कारोबार खरिद बढाए र परिसूचक अन्त्यसम्ममा २५.३० अंकले बढेर १३८८.३१ अंकमा बन्द भएकाे छ ।
आर्थिक बर्षको अन्त्यतिर पूँजीगत खर्चमा भएको वृद्धि र भावी बजेटको अपेक्षा, विदेशबाट कर्जा भित्र्याउने पहलले तरलता सहज हुने र ब्याजदर घट्ने अनुमान, तेस्रो त्रैमासमा कम्पनीहरुले प्रस्तुत गर्नसक्ने वित्तीय विवरणहरु प्रति लगानीकर्ताको सकारात्मक धारणा नै बजार बढ्नुको आधार देखिएको छ ।
नयाँ बर्षदेखि नै नेप्से परिसूचक सँगै कारोबार रकम बढ्दै जान थालेको छ । बुधबार एक अर्ब १२ करोडको सेयर किनबेच भएकोमा बिहीबार पनि कारोबार रकम एक अर्ब ११ करोड पुगेको छ । नेप्सेमा धेरै कारोबार हुने 'क' वर्गका कम्पनीको सेयरमूल्य विहीबार १.७९ प्रतिशतले बढेर २९४.०३ अंकमा पुगेको छ । यसदिन १६८ कम्पनीको २६ लाख ६३ हजार कित्ता सेयर खरिद विक्री भएका छन् ।
बिहीबार भएको १६८ कम्पनीमध्ये ९६ कम्पनीको सेयरमूल्य बढेको छ । यसदिनको कारोबारमा बाणिज्य बैंक र पनि बीमा कम्पनी लगानीकर्ताको छनौटमा परे । बिहीबार एनआइसीएशिया बैंकले वित्तीय विवरण सार्वजनिक गरेपछि लगानीकर्ता बैंकिङ्ग समूहमा तानिएका हुन् । जसले गर्दा बाणिज्य बैंकहरुको ४१ करोड २३ लाखको कारोबार भयो ।
बीमा कम्पनीहरुको पनि २३ करोड ३२ लाख रुपैयाँको सेयर खरिदविक्री भएको छ । लघुवित्त र जलविद्युत्त कम्पनीहरुको २५ करोड बढीको कारोबार हुँदा कारोबार रकम उल्लेख्य बढ्न सहयोग पुगेको हो । बजार बढेसँगै समग्र बजार पूँजीकरण १६ खर्ब २७ अर्बमा उक्लिएको छ ।
विगतको बर्षमा पनि तेस्रो त्रैमासको वित्तीय विवरण प्रकाशित हुने समयमा सेयर बजारमा उछाल आउने देखिने गरेकाले यस बर्षमा पनि बजारमा त्यहि प्रवृत्ति पुनरागमन भएको आंकलन गर्न सकिन्छ । गत बर्ष पनि वैशाख महिनामा ६ दिन एक अर्ब बढीको कारोबार भएको थियो ।
यसदिन चिलिमे हाईड्रोपावर कम्पनीको सबैभन्दा बढी ४ करोड २१ लाख रुपैयाँ बराबरको सेयर कारोबार भएको छ । नेपाल बैंक, सानिमा माईहाईड्रो, सानिमा बैंक, र कुमारी बैंक धेरै कारोबार हुने कम्पनीमा परेका छन् यी सबै कम्पनीको ३ करोड बढीको सेयर खरिदविक्री भए ।
यता सेयर संख्याका हिसाबले सिभिल बैंक लगानीकर्ताको पहिलो रोजाईमा परेको छ । बैंकको बिहीबार मात्रै एक लाख २० हजार कित्ता सेयर किनबेच भयो । विहीबार व्यापार बाहेक अरु सबै उप- समूह बढेका छन् । बीमा सबैभन्दा बढी ५१ अंकले बढेको छ भने फाइनान्स सबैभन्दा कम ३ अंकले मात्र बढ्यो ।
चार कम्पनीहरु प्रोगेसिभ फाइनान्स, खानिखोला हाइड्रो, जनउत्थान लघुवित्त र राष्ट्रिय बीमा कम्पनीको संस्थापक र साधारण सेयरका लगानीकर्ताले ८ प्रतिशत बढीले कमाएका छन् भने प्रोगेसिभ फाइनान्सको सेयरमूल्य १० प्रतिशतको दरले बढेको छ ।
सहयोगी विकास बैंकको सेयरधनीले सबैभन्दा बढी ७ प्रतिशतले गुमाएका छन् भने मिथिला लघुवित्त र सूर्या लाइफ इन्स्योरेन्स कम्पनीको सेयरमूलय ५ प्रतिशत बढीले घटेको छ ।
