कम्पनीले गत बर्षको वित्तीय बिवरणमा देखाएको ब्याज आम्दानी र ब्याज खर्चको जोड घटाउको गल्तीले पुरै वित्तीय बिवरण नै डामाडोल बनेको छ । जसले गर्दा कम्पनीको नाफा नोक्सान तथा प्रतिशेयर आम्दानी लगायतका धेरै सूचाङ्कहरु फरक पर्न गएका छन् ।
कम्पनीको पुरा वित्तीय विवरण हेर्न यहाँ क्लिक गर्नुहोस्
मेरो माइक्रोफाइनान्सले आफ्नो वित्तीय बिवरणमा गत आर्थिक बर्षमा ५३ करोड १९ लाख ब्याज आम्दानी गरेर २६ करोड १४ लाख ब्याज खर्च देखाएको छ । यो हिसाबले कम्पनीको खुद ब्याज आम्दानी २७ करोड ५ लाख हुनुपर्नेमा ५ करोड ३० लाख कम २१ करोड ७४ लाख मात्र उल्लेख गरेको छ ।
कम्पनीको खुद ब्याज आम्दानीमा देखिएको अन्तरले कम्पनीका अन्य सूचकहरु गलत हुँदा कम्पनीको वास्तविक प्रगति नै ओझेलमा परेको छ । कम्पनीले आफ्नो वित्तीय बिवरणमा खुद नाफा ९ करोड ४७ लाख देखाएको छ । तर उसको वास्तविक खुद नाफा १४ करोड ७८ लाख हो ।
वित्तीय बिवरण अनुसार कम्पनीको प्रतिसेयर आम्दानी ३३ रुपैयाँँ १२ पैसा छ । तर उसको वास्तविक प्रतिसेयर आम्दानी ५१ रुपैयाँ ६८ पैसा हुन आउँछ ।
कम्पनीको चुक्ता पूँजी २८ करोड ६० लाख रुपैयाँ छ भने जगेडा कोषमा १५ करोड ८५ लाख रुपैयाँ राखेको छ ।
समय समयमा सूचीकृत कम्पनीहरुले वित्तीय बिवरण प्रकाशन गर्ने क्रममा चरम लापरबाही गर्दै आएका छन् । तर नियामक निकायहरुले गलत वित्तीय विवरण प्रकाशित गरेर लगानीकर्तालाई भ्रममा पार्ने कम्पनीलाई कुनै प्रकारको कारबाही गर्न सकेका छैनन् ।
लगानीकर्ताले कम्पनीको प्रगति बिवरणको आधारमा नै आफ्नो लगानीको निर्णय गर्ने हुँदा गलत वित्तीय बिवरणहरु प्रकाशित गरिँदा लगानीकर्ताको लगानीको जोखिम समेत बढ्दै जाने गर्छ । यसतर्फ सरोकारवाला निकायहरुको बेलैमा ध्यान जान आवश्यक छ ।