बैंकले ब्याजदर घटाएको सूचना मोवाइलको ‘म्यासेन्जर’ मा आउन थाल्यो, ‘ब्याजबाट घर खर्च चलाउछु भन्ने दिन गएछन्’

Apr 16, 2024 06:17 AM Merolagani

बैकहरुले सर्वसाधारणले राखेको पैसाको ब्याजदर धमाधम घटाउन थालेका छन् । नयाँ वर्षको पहिलो दिनदेखि लागु हुने गरी बैंकहरुले ब्याजदर परिवर्तन गरिएको सूचना निक्षेपकर्ताको मोवाइलमा म्यासेज गरी पठाउन थालेका हुन् ।

बैंकहरुले निक्षेपको ब्याजदर ७ महिनाको अवधिमा नै करिव आधाले घटाएका छन् । गत असोजमा सर्वसाधारण निक्षेपकर्ताले बैंकको बचत खातामा राखेको रकममा ६.०३ प्रतिशत ब्याज पाउथे । तर, अहिले त्यस्तो ब्याजदर घटाएर ३.५० प्रतिशतमा झारेका छन् ।

नेपाल इन्भेष्टमेन्ट मेगा बैंकले गत असोजमा बचत खातामा नै ६.०३ प्रतिशत ब्याज दिने गरेको थियो । तर, अहिले उक्त बैंकले बैशाख १ गतेदेखि लागु हुने गरी त्यस्तो ब्याजदर घटाएर ३.५० प्रतिशतमा झारेको सूचना मोवाइलमा पठाएको छ । नेपाल इन्भेष्टमेन्ट मेगा बैंकले ब्याजदरमा पुनर्विचार (रिभाइभ) गरिएको सन्देश म्यासेन्जरमा निक्षेपकर्तालाई पठाएको छ ।

यसैगरी, सानिमा बैंकले पनि निक्षेपको ब्याजदर घटाएको जानकारी निक्षेपकर्तालाई दिएको छ । उसले सञ्चालनमा ल्याएको ‘सानिमा सुलभ सेभिङ’ मा बैशाख १ गते लागु हुने गरी ३.५० प्रतिशत ब्याजदर दिने सन्देश निक्षेपकर्ताको मोवाइलमा पठाएको छ ।

अर्थात ७ महिना पहिला बचत खातामा ६ रुपैयाँ भन्दा बढी ब्याज पाउनेले अहिले ३ रुपैयाँ ५० पैसा मात्र पाउन थालेका छन् । बैंकले निक्षेपको ब्याजदर घटाएपछि त्यसको मार सर्वसाधारणको चुलोमा पर्न गएको छ ।

उपभोग्य बस्तुको मूल्य बढेर चुलो महंगिदै गएको छ । तर, यता बैंकले निक्षेपकर्तालाई दिने ब्याजदर घटाउँदा सर्वसाधारण दोहोरो मारमा परेका छन् ।

एकतिर बस्तुको भाउ बढेको छ, अर्कोतिर बैंकले ब्याजदर घटाउँदै लगेका छन् । यसले गर्दा सर्वसाधारणलाई बाच्नै मुस्किल भएको निक्षेपकर्ताले बताए । ‘पहिला पहिला घर खर्च चलाउनका लागि बैंककै ब्याजदरले भरथेग हुन्थ्यो, अहिले त बैंकमा राखेको पैसाको ब्याजको त केही पनि हुँदैन,’ उनले भने, ‘अहिले त बैंकमा पैसा राख्नु भनेको त चोरी नहोस भन्नका लागि मात्रै हो ।’

ब्याजदर घट्दा बैंकबाट ऋण लिनेलाई फाइदा भएपनि सर्वसाधारण निक्षेपकर्तालाई भने घाटा भएका छ । ऋणको ब्याजदर कुनै बेला १४ देखि १६ प्रतिशतसम्म पुगेको थियो । तर, अहिले ऋणको ब्याजदर १० प्रतिशतमा आउँदा ऋण लिनेलाई त फाइदा नै भएको छ । तर, सर्वसाधारणले बैंकमा जम्मा गर्ने रकम र त्यसबाट पाउने प्रतिफल भने न्यून हुँदै गएको छ ।

बैंकमा पैसा राख्ने र त्यसरी राखिएको पैसाको ब्याजले घर खर्च चलाउनेहरुको जमात धेरै नै छ । स्वदेशमा नै आफ्नो जागिरे जीवनबाट अवकास पाएकाले नागरिकले पनि बैंकमा पैसा राख्ने र त्यही पैसाको ब्याजबाट औषधि तथा घर खर्च चलाउने गर्छन् । तर, बैंकले निक्षेपको ब्याजदर घटाउँदै लगेपछि ब्याजदरमा निर्भर हुनेहरुको बिचल्ली हुने अवस्था आएको छ ।

वाणिज्य बैंकहरुले चैत महिनाका अन्त्यमा बैशाख महिनाका लागि नयाँ ब्याजदर प्रकाशित गरेका थिए । बैंकहरुले प्रकाशित गरेको सूचना अनुसार चैत महिनाको तुलनामा बैंकहरुले बैशाखमा ब्याजदर घटाएका छन् ।

व्यक्तिगत मुद्दती निक्षेपमा चैत महिनामा औसतमा अधिकतम ७.२५ प्रतिशतविन्दुका दरले ब्याज दिइरहेका बैंकहरुले बैशाख महिनामा औसतमा अधिकतम ७.०७ प्रतिशतविन्दुका दरले ब्याज दिने भएका छन् । मुद्दती निक्षेपको ब्याजदर नै ७ प्रतिशतमा आइपुगेको छ ।

मुद्दती निक्षेपको तुलनामा बचत खाताको ब्याजदर कम हुने नै भयो । बैंकहरुले बचत खातामा ब्याजदर घटाउँदै लगेपछि सर्वसाधारण निक्षेपकर्तालाई मर्का पर्ने नै भयो ।

comments powered by Disqus

राजनीतिबाट विरक्तिएपछि पदबाट हटाइदिन अनुरोध गर्दै मन्त्री बुढा, नहटाए आफै राजीनामा दिने, अब कहिल्यै चुनाव नलड्ने

May 19, 2024 04:10 PM

मन्त्री बन्नको लागि राजनीतिक पार्टीका नेताहरुबीच निकै चर्काे हानथाप हुने गर्छ । तर, अहिले एकजना त्यस्ता मन्त्री भेटिएका छन्, जस्ले आफूलाई ‘मन्त्री हुने रहर पुग्यो, मलाई हटाएर अर्काेलाई मन्त्री बनाइदेउ’ भन्दै पार्टी नेताहरुसँग हार गुहार गरेका छन् ।