रायको घरमा उनीसँगै सहयोगी राम उदेन राय पनि बस्ने गरेका थिए । गए राती करिब साढे ८ बजे राय श्राद्धबाट घर फर्किएका थिए । राम उदेनका अनुसार साढे ९ बजेतिर पूर्व राजयमन्त्री रायलाई भेट्न तीन जना व्यक्ति उनको घरमै आएका थिए ।
ती व्यक्तिहरुले पटकपटक रायसँग जग्गाको विवाद मिलाइदिन आग्रह गरेका थिए । यससँगै उनीहरुले रायलाई उक्त जग्गाको विवाद कहिले मिल्छ भन्दै प्रश्न समेत गरेका थिए । जसको जवाफ स्वरुप रायले मिलाउला नि भनेका थिए ।
त्यसपछि, राम उदेनले नै ती व्यक्तिहरुलाई पानी पिउन दिएका थिए । उनले प्रहरीलाई दिएको जानकारी अनुसार उनीहरु सोहि घरमा रात बिताउने भएपछि राम उदेन आफ्नो कोठामा सुत्न लागेका थिए । तर राय र तीन जना एकआपसमा जग्गाकै विषयमा गफ गरिरहेको सहयोगीले सुनेको प्रहरीसँग बताएका छन् ।
तर मध्यरातमा पिसाब गर्न उठेका राम उदेनले आफ्ना मालिकको कोठाको ढोका खुल्लै देखे । जसपश्चात टर्च बालेर हेर्दा पूर्वराज्यमन्त्री रायको हत्या भइसकेको थियो । राय रगतमा लतपतिएको देखेका सहयोगी राम उदेनले तुरुन्तै आफन्तलाई खबर गरेका थिए ।
अहिले रायको शव पोष्टमार्टमका लागि मलंगवा पठाइ सकिएकाे छ । यस विषयमा प्रहरीले राम उदेनसँग थप सोधपुछ गरिरहेको छ भने अन्य अनुसन्धान पनि जारी छ ।
