प्रधानमन्त्री तथा मन्त्रिपरिषद्को कार्यालय, सिंहदरबारमा दिउँसो ४ बजे पत्रकार सम्मेलन हुने सचिवालयले जनाएको छ ।
प्रधानमन्त्री ओलीले आफूले सत्ता सम्हालेपछि बढिरहेको नेप्से परिसूचकलाई आफ्नो सरकारप्रति जनताले गरेको भरोसाको रुपमा व्याख्या गरेका थिए । ५० लाख बढी जनता संलग्न शेयर बजार नयाँ सरकार आएपछि नै उच्च अंकले बढ्नु आफ्नो सरकारप्रति जनताले देखाएको विश्वासको रुपमा उनले लिएका थिए । ‘अब शेयर बजार मात्र होइन, देशको सबै बजार चलायमान हुने छ,’ उनले भनेका थिए ।
तीन हजार पुगेको नेप्से अहिले करिव २५७० नजिक आइपुगेको छ । शेयर बजार उच्चतम विन्दुबाट करिव ४०० अंक तल ओर्लिएको समयमा गर्न लागेको पत्रकार सम्मेलनमा प्रधानमन्त्री ओलीले केही कुरा बोल्ने सम्भावना रहेको छ । तर, बाढी, पहिरो र डुवानका कारण आज पत्रकार सम्मेलनमा शेयर बजारको कुरा गर्ने हुन वा होइनन् त्यो भने अहिले नै भन्न सक्ने अवस्था छैन ।
