नेपाल राष्ट्र बैंकले मंगलबार प्रकाशित गरेको तथ्यांक अनुसार चालु आवको असोज मसान्तसम्म नेपालमा ४ खर्ब ७ अर्ब ३१ करोड रुपैयाँ रेमिट्यान्सको रुपमा नेपाल भित्रिएको छ जुन अघिल्लो आवको सोही अवधिको तुलनामा साढे ११ प्रतिशतले बढी हो । अघिल्लो आवको तीन महिनामा २५.८ प्रतिशतले रेमिट्यान्स बढेको थियो ।
अमेरिकी डलरमा गणना गर्दा यो रेमिट्यान्स ३ अर्ब ४ करोड पुगेको छ । अघिल्लो वर्ष यस्तो आप्रवाह २ अर्ब ७६ करोड रहेको थियो । समीक्षा अवधिमा खुद द्वितीय आय (खुद ट्रान्सफर) ४ खर्ब ४२ अर्ब ४४ करोड पुगेको छ । अघिल्लो वर्षको सोही अवधिमा यस्तो आय रु.४०४ अर्ब ७ करोड रहेको थियो ।
समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या १ लाख १० हजार ५५४ र पुनः श्रम स्वीकृति लिनेको संख्या ५९ हजार ९३९ रहेको छ । अघिल्लो वर्षको सोही अवधिमा यस्तो संख्या क्रमशः १ लाख १३ हजार ३९७ र ४९ हजार २९७ रहेको थियो । नेपालबाट वैदेशिक रोजगार र विदेशमा पढाईको नाममा धेरै नेपाली विदेशिने गरेको छ । वैदेशिक रोजगारमा गएकाले भने धेरै मात्रामा रेमिट्यान्स पठाउने गरेको छ ।
