शेयर बजारमैत्री मानिएका अर्थमन्त्री पौडेल नियुक्ति भएसँगै शेयर बजार उकालो लागेको थियो । तर, अहिले निरन्तर रुपमा शेयर बजार घटिरहेको छ ।
अर्थमन्त्री पौडेलकै पालमा दुई पटक नेप्सेले नयाँ उचाइ चुमेको थियो । ३२ सय नजिक पुगेका नेप्से अहिले २६ सय भन्दा तल आइपुगेको छ ।
निरन्त रुपमा नेप्से घटनुलाई लगानीकर्ताहरुले अर्थमन्त्री पौडेलको कार्यक्षमताको कमी भनिरहेका छन् । आफू अनुकुलका गभर्नर र धितोपत्र बोर्डका अध्यक्ष हुँदा समेत शेयर बजारले गति लिन नसक्नुलाई बिडम्बना नै मानिएको छ ।
अर्थमन्त्री पौडेले आज पत्रकार सम्मेलनमा नियुक्ति भएको ६ महिनमा गरेका कामका बारेमा ‘बिफ्रिङ’ गर्ने सम्भावना रहेको छ । शेयर बजार मैत्री मानिएका उनले घटिरहेको शेयर बजारका बारेमा के बोल्ने हुन लगानीकर्ताहरु भने त्यसको प्रतिक्षा गरिरहेका छन् ।
केही दिन अघि प्रधानमन्त्री केपी शर्मा ओलीले नेकपा एमालेको केन्द्रीय कमिटी बैठकमा पेश गरेको राजनीतिक प्रतिवेदनमा पुँजी बजार सकारात्मक गतिमा रहेको उल्लेख गरेका थिए ।
कुनै बेला ३२ सय नजिक पुगेको नेप्से अहिले घटेर २५ सय अंकका लाइनमा छ । पुँजी बजार सुधारका काम नभएका कारण लगानीकर्ता हतोत्साहित हुँदा नेप्से ओरालो लाग्न पुगेको कुरा कसैले लुकाउन सक्ने अवस्था छैन् ।
तर, यता नेकपा एमालेका अध्यक्ष समेत रहेका ओलीले भने शेयर बजार सकारात्मक सुधार हुँदै आएको प्रतिवेदनमा उल्लेख गरेका थिए ।
बास्तविक बजार र उनको प्रतिवेदन ठिक विपरित छ । अर्थात नेप्से घटेको छ तर ओलीको प्रतिवेदनमा ‘पुँजी बजारमा सकारात्मक सुधार हुँदै आएको छ’ भनिएको थियो ।
ओलीको राजनीतिक प्रतिवेदनमा पछिल्लो समसामयिक राजनीति, सरकार गठन भएपछिको ६ महिने समीक्षा, सरकार सञ्चालन, अर्थतन्त्र लगायतका विषयमा उल्लेख गरिएको थियो । अर्थमन्त्री पौडेले पनि आफू नियुक्ति भएको ६ महिनाको कामको फेहरिस्त प्रस्तुत गर्ने सम्भावना रहेको छ ।
यता लगानीकर्ताहरु भने आज अर्थमन्त्रीले पत्रकार सम्मेलनमा शेयर बजारका बिषयमा ओलीकै बोली बोल्ने हुन कि फरक शैलीमा प्रस्तुत ब्याग्र प्रतिक्षा गरिहेका छन् ।
