समाचार संस्था रोयटर्सका अनुसार मस्कले सरकारी कर्मचारीलाई अहिले धमाधम राजीनामा गर्न चेतावनी दिँदै पठाइरहेका छन् । ‘सरकारको लागि धेरै काम गर्यौ, अब सपनाको गन्तव्यमा गएर छुट्टी 
मनाउ’ भन्दै ती कर्मचारीहरुलाई धमाधम इमेल पठाउने काम भइरहेको बताइएको छ । इमेलमा सरकारी कर्मचारीहरूलाई स्वेच्छाले जागिर छोडेमा नगद प्रोत्साहन सहित बिदा दिने प्रस्ताव गरिएको छ ।
राजीनामा दिन आनाकानी गर्ने कर्मचारीहरुलाई हतोत्साहित गर्न शुरु गरिएको छ । त्यसक्रममा कतिपय कर्मचारीलाई कुनै काम नै नदिइ त्यत्तिकै राखिएको छ भने कतिपयलाई भने मुद्दामामिलामा फसाईदिने भन्दै मस्कका सहयोगीहरुले धम्की दिन थालेको बताइएको छ । उनीहरुले संघीय निजामती सेवाको व्यवस्थापन गर्ने ‘अफिस अफ पर्सनल म्यानेजमेन्ट’ लाई ‘नियन्त्रण’ मा लिएका छन् । यो नेपालको निजामती किताबखाना र लोक सेवा आयोगजस्तै निकाय हो ।
ती कर्मचारी हटाएपछि ती मध्ये कतिपय महत्वपूर्ण पदहरुमा मस्कले आफ्नो कम्पनीका कर्मचारीहरुलाई नियुक्त गर्न लागेको समाचर संस्थाहरुले उल्लेख गरेका छन् ।
स्मरणरहोस सरकारी प्रशासन सुधारका लागि भन्दै डोनाल्ड ट्रम्पले राष्ट्रपतिमा निर्वाचित हुनासाथ दक्षता विभाग स्थापना गरेका थिए । उनले यसको जिम्मेवारी सम्हाल्न विवेक रामास्वामी र इलनलाई छानेका भए पनि ट्रम्पले जनवरी २० मा शपथग्रहण गरेको केही घण्टापछि नै रामास्वामीले नियुक्ति अस्विकार गरेको घोषणा गरेका थिए ।
