दोस्रो बजारमा सूचीकृत भएका कम्पनीहरु मध्ये हाईड्रोपावर कम्पनीमा लगानीकर्ता सदावाहर आकर्षण हुने गरेका छन् । औसत कारोबारको झण्डै ५० प्रतिशत हिस्सा हाईड्रो समूहको नै हुने गरेको छ । लगानीकर्ताको आकर्षणकाे क्षेत्र भए पनि दोस्रो बजारका लगानीकर्ताले दीर्घकालीन लगानीको लागि हाईड्रोकाे छनाैट कम गर्ने गरेका छन् ।
आयोजना निर्माण भएको ३० वर्षपछि कम्पनीको स्वामित्व सरकारलाई सुम्पनै पर्ने भन्दै लगानीकर्ताहरुले दीर्घकालीन लगानी गर्न नसकेका पनि हुन सक्छन्। तर,कम्पनीको स्वामित्व सरकारलाई सुम्पन पर्ने कुरा सत्य नभएको स्वतन्त्र उर्जा उत्पादकहरुकाे संस्था, नेपाल (इप्पान)का उप महासचिव प्रकाश दुलालले स्पष्ट पारेका छन् ।
