सरकारले १ वर्षभित्रै २५ लाख सवारीसाधनमा इम्बोस्ड नम्बर प्लेट जडान गर्ने गरि व्यापक रुपमा तयारी शुरु गरेको छ । यो नम्बर प्लेट विगतमा जस्तो आफैँ जडान गर्न नसकिने बताइएको छ।

विभागले इम्बोस्ड नम्बर प्लेट जडान गर्नका लागि तोकिदिएको स्थानमा पुगेर सवारीधनी आफैँले जडान गराउनुपर्ने हुन्छ।

दुईपांग्रे सवारीसाधनमा इम्बोस्ड नम्बर प्लेट जडान गर्न २ हजार ५ सय, तीनपांग्रे सवारीसाधनमा जडान गर्न २९ सय, साना चारपांग्रे सवारीसाधनमा जडान गर्न ३२ सय र ठुला सवारीसाधनमा जडान गर्न ३६ सय रूपैयाँ तिर्नुपर्ने व्यवस्था गरिएको छ ।

हाल नेपालभर झन्डै ६० लाख सवारीसाधन दर्ता भएका छन् तीमध्ये एक वर्षभित्र २५ लाख र बाँकी ३५ लाखमा अर्काेवर्षसम्म इम्बोस्ड प्लेट राख्ने गरि काम भइरहेको यातायात व्यवस्था विभागले जानकारी दिएको छ । त्यहीअनुसार हालसम्म विभागले पाँच लाख त्यस्ता प्लेट छापिसकेको छ ।

इम्बोस्ड नम्बर जडानका लागि २०७३ जेठ १९ मा बङ्गलादेश र अमेरिकाको बहुराष्ट्यि कम्पनी डेकाटुर–टाइगर आईटी कम्पनीसंग ५ वर्षे सम्झौता गरिएको थियो । तर, नेपालमा त्यसको व्यापक विरोध भएपछि सरकार कम्पनीसंगको सम्झौतालाई पछि सारिरहेको थियो । पछिल्लो पटक भने अदालतबाट समेत अनुमति प्राप्त गरि २०८२ मंसिर भित्र २५ लाख सवारीमा इम्बोस्ड नम्बर जडान गरिसक्नुपर्ने गरि सम्झौता नविकरण गरिएको छ । त्यही अनुसार अहिले धमाधम नम्बर प्लेट छपाईको काम भइरहेको विभागका अधिकारीहरुले जानकारी दिएका छन् ।

यातायात व्यवसायीहरु भने महंगो भएकोले सरकारले इम्बोस्ड नम्बर प्लेट जडान गरिदिनु पर्ने अडानमा छन् । विभागका अनुसार विशेष खालको विद्युतीय चिप राखिएको इम्बोस्ड नम्बर प्लेटमा सवारीसाधन तथा सवारीधनीको सम्पूर्ण विवरण उल्लेख हुन्छ ।

तर यसको जडान निश्चित यातायात कार्यालयहरूमा नै आएर गर्नुपर्ने हुनाले प्लेट छपाइदेखि जडानसम्मको प्रक्रिया खर्चिलोको साथै झण्झटिलो देखिएको छ ।

यातायात व्यवस्था विभागका अधिकारीहरु इम्बोस्ड प्लेट छाप्ने उद्योग काठमाडाैमा मात्र रहेकोले त्यस्तो झण्झटिलो भएको बताउँछन् ।

र प्रदेशहरूबाट आएको मागका भरमा छापेर पठाइने गरिएको जनाएको छ । त्यसकै कारण हालसम्म छापिएका प्लेटहरू पनि उल्लेख्य सङ्ख्यामा जडान हुन नसकेको बताइएको छ ।