शनिबारदेखि लागू हुने गरि अमेरिकी राष्ट्रपति डोनाल्ड ट्रम्पले घोषणा गरेको कर वृद्धिको जवाफमा चीनले पनि कर लगाएपछि अमेरिकी शेयर बजार अस्तव्यस्त भएको छ। चिनियाँ निर्णयको असर जर्मनी, फ्रान्ससँगै एसियाली मुलुकको शेयर बजारमा पनि परेको छ । 

यसले व्यापार युद्ध विस्तार हुने र विश्वव्यापी अर्थतन्त्रमा क्षति पुग्ने सम्भावना बढाएको छ ।

अमेरिकाको ठूला कम्पनीहरुको शेयर सूचंकाका (एस एन्ड पी ५००) करिब ६ प्रतिशतले घटेको छ भने बेलायतको शेयर सूचकाँक (एफटीएससी १००) लगभग ५ प्रतिशतले घटेको छ । यो पाँच वर्षमा भएको सबैभन्दा तीव्र गिरावट हो । जर्मनी, फ्रान्ससहित एशियाी देशहरुका शेयर बजार पनि घटेका छन् ।

ट्रम्पले भने अहिलेको उथलपुथलबाट नआत्तिन अमेरिकी लगानीकर्तालाई आग्रह गरेका छन् । दृढ सङ्कल्प सहित बस्नुस् हामी हार्न सक्दैनौ, उनले सामाजिक सञ्जालमा लेखेका छन् ।

ट्रम्पले प्रत्येक देशबाट आउने सामानहरूमा १० प्रतिशत अतिरिक्त आय कर लगाउने घोषणा गरेदेखि विश्वव्यापी शेयर बजारले खर्बौँ डलरको मूल्य गुमाएको छ। त्यसमा चीन, युरोपेली सङ्घ र भियतनाम जस्ता प्रमुख व्यापारिक साझेदारहरू सहित दर्जनौँ देशका उत्पादनहरूले धेरै उच्च दरहरूको सामना गरिरहेका छन् ।

यी उपायहरूले व्यापारमा सङ्कुचन ल्याउने ठानिएको बताउँदै उनीहरूले यसले धेरै देशहरूलाई आर्थिक मन्दीमा धकेल्न सक्ने भन्दै चेतावनी दिएका छन् ।

चीनले शुक्रबार ट्रम्पको कदमहरूलाई धम्की र अन्तर्राष्ट्रिय व्यापार नियमहरूको उल्लङ्घन भएको भन्दै अमेरिकी सामानहरूमा ३४ प्रतिशत आयात कर लगाउनुको साथै मुख्य खनिजहरूको निर्यातमा रोक लगाएको छ भने अमेरिकी कम्पनीहरूलाई आफ्नो कालोसूचीमा राखेर ट्रम्पको कदमलाई कडारुपमा जवाफ दिएको छ ।

उता, युरोपेली सङ्घले पनि आवश्यक परेको बेला अमेरिकासंग बार्ता गर्न तयार रहेको भन्दै ‘ट्रम्पले सृजना गरेको व्यापार आतंकविरुद्ध एक भएर लड्ने’ घोषणा गरेको छ । संघका व्यापार आयुक्त मारुस सेफ्चोविचले युरोपेली सङ्घ युरोपको व्यापारिक हित रक्षाको लागि सक्ष्म रहेको दावी समेत गरेका छन् ।