नेप्सेका प्रमुख कार्यकारी अधिकृतमा नयाँ नियुक्ति भएसँगै शेयर बजारबाट धरै कुराको अपेक्षा लगानीकर्ताले गरेका छन् । शेयर बजारसँग सम्बन्धी काम गर्न नियुक्त भएका सीईओले पनि बजारको विषयमा बुझ्नै पर्ने हुन्छ । सरोकारवालाहरुको सल्लाह सुझाव लिएर मात्रै नै बजारको हितमा काम गर्ने सीईओ चापागाईँले बताएका छन् ।
अन्तराष्ट्रिय पूँजी बजारले ठूलो फड्को मारेको छ । तर नेपालको पूँजी बजारको तुलनात्मक रुपमा विकास हुन सकेको छैन । प्रविधिको विकाससँग विश्व ग्लोबल भिलेज भएको छ । सोसँगै नेपाली बजारमा लगानी गर्ने लगानीकर्ताले पनि अन्तर्राष्ट्रिय बजारकाे जस्तै सेवा र सुविधा चाहेका छन् ।
विगत लामो समयदेखि नेपालमा शेयरको मात्रै कारोबार भइरहेको छ । शेयर बजारपनि एकतर्फी भएका कारणले गर्दा बजारबाट कमाउनको लागि सूचक बढ्नै पर्ने हुन्छ । बुल र वियरको लामो अवधिको चपेटामा लगानीकर्ताहरु सधै फस्ने गरेका छन् । त्यसैले नयाँ नेतृत्व आएसँगै लगानीकर्ताहरुले नेपाली बजार पनि अन्तराष्ट्रिय स्तरमा विकास भएसरह हुनुपर्ने बताएका छन् ।
नेपाल स्टक एक्सचेञ्ज पनि प्रतिस्पर्धी र दीगो विकास हुनेगरी अगाडि बढ्नु पर्ने नेपाल इन्भेष्टर्स फोरमका अध्यक्ष तुलसीराम ढकालले बताए । नेप्सेलाई आधुनिकरण गरेर प्रविधि मैत्री बनाउनु पर्ने उनकाे भनाइ छ । इन्ट्र डे सटसेलको सुविधा दिनु पर्ने र बजारमा कारोबार गर्ने लगानीकर्तालाई सचेतनाको कार्यक्रमलाई चुस्त राख्नु पर्ने ढकालले बताए ।
त्यसैगरी लगानीकर्ता ताराप्रसाद फुल्लेलले नेप्सेले समय सापेक्षित रुपमा कारोबार गराउन स्टिमलाई चुस्त दुरुस्त र कुनै समस्या नआउने गरी सुधार गर्नुपर्नेमा जोड दिए । 'नयाँ टीएमएस पनि सञ्चालन आएका छन् । लगानीकर्ता मैत्री सुविधाहरु राखेर सञ्चालनमा ल्याउनु पर्ने हुन्छ । नेप्सेले लगानीकर्ताहरुको लागि दिनुपर्ने सुविधा कर्मकान्डमा मात्र आधारित छन् । सरकारी स्वामित्व भएकै कारणले कामहरु कायान्वयन गर्न ढिला सुस्ती हुने गरेको छ । त्यसैले पनि बजारको विकास अपेक्षित रुपमा हुन नसकेको हुँदा नेप्सेको पुनर्संरचनाको कामलाई महत्वको साथ गर्नुपर्ने हुन्छ,' उनले भने ।
सबै पक्षहरु सकृय भएमा शेयर बजारको हित हुने स्टक ब्रोकर एसोसिएसनका पूर्वअध्यक्ष तथा ब्रोकर नम्बर ३५ का भरत रानाभाटले बताए । नेपालको पूँजी बजारको विकास गर्नको लागि धेरै कामहरु गर्न जरुरी छ । बजारकाे सुधार एक पक्षले मात्रै चाहेर हुँदैन । नियामक, बजार सञ्चालक, ब्रोकर लगानीकर्तालगायत अन्य स्टेक होल्डर्सहरुकाे पनि उत्तिकै जिम्मेवार हुनुपर्ने रानाभाटले बताए ।
त्यसैगरी, मार्जिन ल्याडिङको काम हुन सकेको छैन । विभिन्न बहानामा लामो समयदेखि रोकिएको छ । यसलाई सहजिकरण गर्नु पर्ने हुन्छ । नेप्सेले सहजिकरण गरिदिने र बोर्डले यसलाई कार्यान्वयनमा ल्याउने हो भने रोकिएको बजारको विकासले थारै भएपनि फड्को मार्ने थियो र लगानीकर्ताले ब्रोकरबाट सहजै सुविधा पाउने रानाभाटको बुझाई छ । नेपाल धितोपत्र बोर्ड र नेप्से दुवै निकायको नेतृत्व नयाँ भएका कारण बजारको विकासमा हातेमालो गरेर लाग्ने हो भने बजारको द्रुत रुपमा विकास हुने दावी रानाभाटको छ ।
शेयर बजार संवेदनशिल छ । लाखौ लगानीकर्ताको सम्पत्तिको कारोबार गराउने नेप्सेले बजार विकासमा सधै सचेत हुन जरुरी हुन्छ । समय अनुसार प्रविधिको विकास नहुदा दोस्रो बजारका लगानीकर्ताहरु घट्यो र बढ्यो भन्नेमा मात्रै सिमित छन् । बजारमा नोक्सानी मात्रै हुन्छ भन्नेमा लगानीकर्ताहरु संसकित छन् । यस्तो अवस्थामा लगानीकर्ताले बजार प्रतिको विश्वास जगाउँदै, लगानीको सुरक्षा प्रत्याभूति गर्दै लगानी क्षेत्रको लागि राम्रो विकल्पको रुपमा नेप्सेको विकास गर्न जरुरी रहेको जानकारहरुको बुझाई छ ।
