यसले गर्दा उक्त पार्टीका नेता कार्यकर्तालाई मात्र नभएर अन्य पार्टीका नेता कार्यकर्तामा समेत उक्त पार्टीले कसलाई उम्मेदवार बनाउला र परिणाम कस्तो आउला भन्ने खुल्दुली उत्पन्न भएको छ ।
एमाले उपाध्यक्ष तथा इलाम क्षेत्र नं २ का सांसद सुवास नेम्वाङको मृत्यु भएपछि २०८१ बैशाख १५ गते भएको उप निर्वाचनमा उम्मेदवारीका लागि उक्त पार्टीले आफ्ना पार्टीहरुले जस्तो पार्टीभित्र आन्तरिक छलफल नगरि आँकाक्षीहरुसँग आवेदन माग गरेको थियो । त्यसक्रममा गोकुल बहादुर राई, जमुना शर्मा, महेन्द्र कुमार थापा, मान बहादुर घिमिरे, र डा. शेषरमण न्यौपाने र मिलन लिम्बुले आवेदन दिए ।
आवेदन दिएका अन्य व्यक्तिहरु स्थापनाकालदेखि नै पार्टीमा जोडिएको भए पनि लिम्बु भने जोडिएका थिएनन् । माओवादी कार्यकर्ता रहेका उनी पार्टीले कांग्रेससँग गरेको गठबन्धनको कारण टिकट पाउने अवस्था नभएपछि स्वतन्त्र लड्ने घोषणा गरेका थिए । अन्त्यमा रास्वपा सभापति रवि लामिछानेसँग भेट गरेपछि पार्टी प्रवेश गरि उम्मेदवार बनाइए । परिणाम एमाले उम्मेदवार सुहाङ नेम्वाङ २७,७७२ मतका साथ विजयी हुँदा लिम्बुले केवल ५०५० भोट ल्याएर चौथो त बने, तर उनको जमानत जफत भयो ।
राप्रपाबाट निर्वाचित साँसद दीपक बोहोराको मृत्यु भएपछि कार्तिक १७ गते रुपन्देही क्षेत्र नं ३ मा उप निर्वाचन हुँदैछ । त्यसको लागि अन्य पार्टीहरुमा स्थानीय पार्टी कमिटीहरुमार्फत उम्मेदवारका बारेमा बहस, छलफल गरिरहेका छन् ।
तर, रास्वपाका स्थानीय कमिटीहरु भने उम्मेदवारकाे बारेमा बहस गरिरहेका छैनन् । किनकी उनीहरुलाई त्यो अधिकार नै छैन । पार्टीको केन्द्रिय समितिले उम्मेदवार हुन चाहानेहरुको लागि २५ हजार रुपैयाँको दस्तुरसहित साउन २१ गतेसम्मको हदम्याद दिएर आवदेन माग गर्यो । त्यो अवधिमा ९ जनाले आवेदन दिए । आवेदन दिनेहरुमा सुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, जीतबहादुर गुप्ता, कुसुम महर्जन, रचना क्षेत्री, पुनम कुमारी अग्रवाल र मधुप्रसाद अर्याल रहेका छन् ।
भदौ १५ मा उम्मेदवारको अन्तिम नाम सार्वजनिक गर्ने भन्दै पार्टी केन्द्रिय समितिका विपीन आचार्यलगायतका पदाधिकारीहरुले अहिले उम्मेदवार हुन चाहानेहरुसँग एक्ला एक्लै वा सामुहिकरुपमा अन्तर्वार्ता लिइरहेका छन् । अन्तर्वार्तापछि आवेदन दिनेहरुमध्येबाट कसलाई उम्मेदवार बनाउने वा सबैलाई असफल बनाएर अर्कै व्यक्तिलाई उम्मेदवार बनाउने भन्ने टुंगो गरिदैंछ ।
‘अरु पार्टीमा पो कार्यकर्ताले सिफारिस गर्छन् र त्यसको आधारमा नेताले सिफारिस गर्छन्, हाम्रो पार्टीमा त कार्यकर्ताको काम झोला बोक्ने बाहेक अरु केही नहुने रहेछ, नेताले जे भन्यो त्यही खुरुक्क मान्नु पर्ने । वास्तविक झोले त हाम्रो पार्टीका कार्यकर्ता पो रहेछौं,’ रास्वपा रुपन्देहीका एक नेताले मेरो लगानीसँग भने ।
उनका अनुसार सह महामन्त्री आचार्य र कोषाध्यक्ष लिमा अधिकारीलगायतका नेताहरुले सभापति लामिछानेको संकेत अनुसार उम्मेदवारी छनौट गर्ने विश्वास गरिएको छ । अहिलेका ९ जना मध्येमै कोही उम्मेदवार हुन्छन् कि इलाममा जस्तो अरु पार्टीबाट उम्मेदवार बनाउने गरि प्रवेश गराइन्छ भन्ने बारेमा आफूहरुमै अन्योल रहेको उनको भनाइ छ । सम्वन्धित क्षेत्रका कार्यकर्ताको बीचमा उम्मेदवारहरुको बारेमा सामान्य छलफल हुने वातावरण समेत नबनाइएकोले अरु पार्टीहरुमा जस्तो बहस छलफलको अवस्थै नरहेको उनको भनाइ छ ।
आवेदकहरु को कस्ता ?
रास्वपाले पहिलो नम्बरमा नाम सार्वजनिक गरेका खरेल अमेरिका बस्दै आएका थिए । खरेल लामिछानेकै आग्रहमा उनी रुपन्देही–३ बाट निर्वाचन लड्नकै लागि नेपाल आएको चर्चा छ ।
त्यस्तै, महर्जन गत आम निर्वाचनमा समानुपातिक उम्मेदवार थिइन् । उनी रास्वपा केन्द्रीय सदस्य हुन् । भैरहवा माइती भई काठमाडौं बस्दै आएकी उनी अहिले उम्मेदवार बन्नकै लागि समानुपातिक सूची आफ्नो नाम हटाएकी हुन् । पार्टी सचिवालयले पनि उनले समानुपातिकको सूचीबाट नाम हटाउन दिएको निवेदन स्वीकृत गरिसकेको छ ।
अर्का निवेदक अर्याल रुपन्देही–३ का सभापति हुन् । उनी मन्टेश्वरी स्कुलका सञ्चालक पनि हुन् ।
ज्ञानु पौडेल लुम्बिनी विशिष्टीकृत सहकारीको अध्यक्ष र केन्द्रीय वचत तथा ऋण सहकारी संघकी केन्द्रीय सदस्य हुन् ।
जिल्ला कोषाध्यक्ष क्षेत्री भैरहवा निवासी हुन् । डा. थापा न्यूरो सर्जन हुन् । उनको भैरहवामा आफ्नै क्लिनिक छ । थापा गत निर्वाचनमा नागरिक उन्मुक्ति पार्टीबाट प्रदेश सभा सदस्य पदमा समानुपातिक उम्मेदवार थिए ।
गुप्ता २०७९ को चुनावमा पनि यही क्षेत्रबाट उम्मेदवार थिए । राप्रपाका दीपक बोहराले ३६ हजार ७ सय १७ मत ल्याएर निर्वाचित हुँदा गुप्ताले ५ हजार ७९६ मत ल्याएका थिए ।
पार्थवेन्द्र रुपन्देही क्याम्पस भैरहवाका क्याम्पस प्रमुख थिए । उम्मेदवार बन्नका लागि उनले पदबाट राजीनामा दिएका छन् ।
उनी अघिल्लो चुनावमा विवेकशील साझा पार्टीबाट रुपन्देही ३ मै संघीय सांसदको उम्मेदवार थिए ।
रचना क्षेत्री पार्टीको जिल्ला कोषाध्यक्ष हुन् । उनी मन्टेश्वरी विद्यालय सञ्चालक हुन् । पुनमकुमारी अग्रवाल नेपालकै ठूलो प्रांगारिक मल उद्योगकी सञ्चालक हुन् ।
