परराष्ट्र मन्त्रालय स्रोतले दिएको जानकारी अनुसार मिश्रीले भ्रमणको क्रममा राष्ट्रपति रामचन्द्र पौडेल, प्रधानमन्त्री ओली, परराष्ट्रमन्त्री डा. आरजु राणा देउवालगायत उच्च पदस्तहरुलाई भेट गर्नेछन् ।
भ्रमणको अवसर पारेर नेपालसँग निकै लामो समयदेखि अड्केर बसेको सुपुर्दगी सन्धिमा हस्ताक्षर गर्ने भारतको प्रस्ताव रहेको छ । नेपाल सरकारको तर्फबाट त्यसबारेमा अहिलेसम्म औपचारिक रुपमा कुनै जानकारी गराइएको छैन । नेपाल हुँदै तेस्रो मुलुकका नागरिक भारत छिर्न सक्ने र भारतमा अपराध गरेकाहरु नेपाल हुँदै तेस्रो देशमा भाग्ने गरिरहेको भन्दै भारतले सुपुर्दगी सन्धीलाई ओलीको भ्रमणको मुख्य एजेण्डाको रुपमा उठाउने तयारी गरिरहेको बताइएको छ ।
नेपालले नेपाली उत्पादनलाई भारतीय बजारमा सहज पहुँचको साथै सीमा सुरक्षालगायतका विषयहरुलाई गम्भिरतासाथ उठाउने तयारी गरेको छ । तर, विवादास्पद लिम्पियाधुरा, लिपुलेकलगायतका विषयमा भने दुवै पक्ष तैं चुप मै चुपको अवस्थामा रहने अर्थात कुनै चर्चा नगर्ने ‘मुडमा रहेको’ परराष्ट्र मन्त्रालय सम्वन्ध स्रोतको दावी छ । ‘अहिलेको समयमा त्यसबारेमा धेरै कुरा उठाउनु हुँदैन भन्ने मनस्थिति दुवै पक्षको देखिन्छ, बाँकी कुरा त भ्रमणकै बेला थाहा होला’ मन्त्रालयका एक सहसचिवले मेरो लगानीसँग भने ।
यता भ्रमणकै अवसर पारेर नेपाललाई १५ वटा तालिम प्राप्त कुकुर दिने भन्दै प्रस्ताव भारतले गरेको बताइएको छ । साउन पहिलो साता द्धैपक्षिय वार्ताको लागि भारत गएका गृह सचिव गोकर्णमणि दुवाडीमार्फत भारतले त्यस्तो प्रस्ताव गरेको हो । नेपाल प्रहरीको तालिम र अनुसन्धानको लागि ती कुकुरहरु लिने विषयमा सरकार सकारात्मक भए पनि प्रधानमन्त्रीको भ्रमणकै बेला ती कुकुर ल्याउने बारेमा सम्झौता गर्ने बारेमा निर्णय भइसकेको छैन । ‘कुकुर लिएर आयो भनेर अनावश्यक हल्ला होला र भ्रमणका अरु विषयहरु नै ओझेलमा पर्लान कि भन्ने चिन्ता देखिएको छ’ सम्वद्ध स्रोतले भन्यो । यस अघि प्रचण्ड प्रधानमन्त्री भएको बेला भारत भ्रमणमा जाँदा केही भैंसी र राँगाहरु लिएर आएको विषय अहिले पनि नेपाली राजनीति वृतमा गिल्लाको विषयको रुपमा लिने गरिन्छ ।
