निगममा २,००४ कर्मचारीहरू कार्यरत रहेकामध्ये स्थायी कर्मचारीको सङ्ख्या केवल ९२६ रहेको छ भने अस्थायी ५३९, करारका २७३ र ज्यालादारीसहित अन्य २६६ कर्मचारी रहेका छन् ।
ती मध्ये स्थायी कर्मचारीलाई राखेर अस्थायी, करार र ज्यालादारीमा रहेका कर्मचारीलाई अवकाश दिने तयारी गरिएको हो । तर, एकै पटक अवकाश दिँदा आन्दोलन चर्किन सक्ने भएकोले विभिन्न स्किमसहित चरणवद्ध रुपमा अवकाश दिने गरि तयारी शुरु भएको निगमको व्यवस्थापन स्रोतले जानकारी दिएको छ ।
स्रोतका अनुसार पर्यटन, संस्कृति तथा नागरिक उड्डयन मन्त्रीसमेत रहेकी प्रधानमन्त्री सुशीला कार्कीले हालै निगमका अध्यक्ष विक्रम राईसहित संचालक समितिका पदाधिकारी र व्यवस्थापनका उच्च अधिकारीहरुलाई बोलाएर छलफल गरेकी थिइन् । त्यस क्रममा उनले निगम सुधारका एजेण्डा माग गर्नुको साथै राजनीतिक पहुँचको आधारमा नियुक्त भएका अस्थायी, करार र ज्यालादारी कर्मचारीलाई हटाउनको लागि स्पष्ट खाका पेश गर्न समेत आदेश दिएकी थिइन् ।
त्यहीअनुसार निगमको संचालक समितिले अहिले कर्मचारी अवकाशको खाका बनाइरहेको निगम स्रोतले मेरो लगानीलाई जानकारी दियो । पहिले नियुक्ति भएकोलाई पहिले अवकाश दिने र त्योअनुसार क्रमिक रुपमा पछि नियुक्ति भएकोलाई पछि अवकाश दिने, निगमलाई ठूलो मात्रामा अतिरिक्त व्ययभार नपर्ने गरि अवकासका स्किमहरु लागु गर्नेलगायतका योजनाहरु बनाइरहेको र प्रधानमन्त्री कार्कीसहित मन्त्रालयका उच्च अधिकारीसँग छलफल गरेपछि त्यसलाई अन्तिमरुप दिने तयारी भइरहेको निगम स्रोतले जानकारी दियो ।
हाल झन्डै १७ अर्ब रुपैयाँको सञ्चित नोक्सानी रहेको नेपाल वायुसेवा निगमसँग आन्तरिकतर्फ उड्ने एउटा र अन्तर्राष्ट्रिय उडान भर्ने दुईवटा वाइडबडी एक दुईवटा न्यारोबडी गरी चारवटा मात्र जहाजहरू छन् । नेपाल वायुसेवा निगमका विभिन्न आठ देशका ११ वटा ठाउँमा कार्यालयहरू रहेका छन् ।
