गत साताको अन्तिम दिन सूचक २५६०.२९ अंकमा रहेको थियो भने सोही सूचक यस साता अन्तिम दिन २६७६.०३ अंकमा बन्द भएको छ। जुन ११५.७४ अंकको वृद्धि हो भने प्रतिशतको आधारमा ४.५२ प्रतिशत हो।
लगातार सूचक बढ्नुमा धेरै फ्याक्टरले काम गरेको भएपनि नेकपा एमालेले निर्वाचनमा सहभागी हुन निर्वाचन आयोगमा दल दर्ता हुनुलाई प्रमुख फ्याक्टरको रुपमा लिइएको छ। जेनजी विद्रोह र त्यसपछि बनेको सरकारप्रति शेयर बजारका लगानीकर्ताको मनोबल सोचेभन्दा बढी नै खस्किएको थियो। सरकारले आउने फागुन २१ गते निर्वाचन गर्ने भनेर घोषणा त गर्यो तर दलहरू तत्कालै सहमत देखिएनन्। त्यसले निर्वाचन हुन्छ कि हुँदैन भन्नेमा लगानीकर्ता सबैभन्दा बढी दुबिधामा थिए। निर्वाचन नभए मुलुकले कस्तो दिशा तय गर्दा भन्ने कौतुहलता आम लगानीकर्तामा थियो। जसले गर्दा शेयर बजारले पनि गति लिन सकिरहेको थिएन। तर निर्वाचनको लागि दल दर्ता गर्नु पर्ने अन्तिम दिनमा आएर नेकपा एमालेले दल दर्ता गर्यो। त्यसपछि भने आम लगानीकर्तामा निर्वाचन हुन्छ भन्ने विश्वास बढेर गएको कारण शेयर बजारले गति लिन थालेको मेरो लगानीसँगको संवादमा नेपाल इन्भेष्टर्स फोरमका अध्यक्ष तुलसीराम ढकालले बताए।
निर्वाचन हुन्छ कि भन्ने सन्देश दिने दल नेकपा एमाले बन्यो। उसले गत कात्तिक ८ गते दल दर्ता गराएको हो। उसले दल दर्ता गर्दै छ भन्ने खबर चुहिएको कारण नै गत आइतबार देखि नै सूचकले बढ्दो लय समातिसकेको थियो। अझै उसले दल दर्ता नै गरेपछि भने शेयर बजार बढ्ने क्रमले थप निरन्तरता पायो। जुन गत साताभरि नै रह्यो।
तर दल दर्ता हुँदै छ भन्ने खबरले गएको आइतबार र सोमबार शेयर बजार जसरी फराकिलो अंकले बढ्यो तर त्यसपछि भने बजारले ठूलो अंकको बृद्धि कायम गर्न सकेको छैन। आइतबार करिब ४० अंकले बढेको बजार सोमबार ५०.४४ अंकले बढ्यो। तर दल दर्ता भएको दिन देखि भने बजार सामान्य अंकले मात्रै बढ्दै आएको छ।
दल दर्ता पछि सामान्य अंकले मात्रै बढ्नुलाई पनि नेकपा एमाले कारण मानिएको छ। गत मंसिर ९ गते नेकपा एमालेले निर्वाचन आयोगमा दल मात्रै दर्ता गराएन, उसले प्रतिनिधि सभा पुनर्स्थापनाको रिट पेस सँगसँगै गर्यो। मंगलबार एमालेले बिहानै निर्वाचन आयोग पुगेर दल दर्ता गर्यो भने सोही दिन सर्वोच्च अदालतमा संसद पुनर्स्थापनाको रिट निवेदन पेस गर्यो। जसले गर्दा फेरि पनि संशय कायम नै रहने अवस्था सिर्जन गराइदिएका कारण शेयर बजारले तीव्र गति लिन नसकेको लगानीकर्ता सन्तोष भट्टराईले विश्लेषण छ।
भट्टराईका अनुसार यदि दल मात्रै दर्ता गराएको भए अहिले शेयर बजारले सेन्चुरी मात्रै नभएर डबल सेन्चुरी नै मार्ने थियो। तर दल दर्ताले केही लगानीकर्तामा कन्फिडेन्स बढेको कारण सामान्य अंक भएपनि शेयर बजार बढ्दै गइरहेको हो। सामान्य अंकले बजार बढ्नुमा अर्को फ्याक्टरले पनि काम गरेको छ। नेपाल राष्ट्र बैंकले मौद्रिक नीतिको समीक्षा गर्दै छ। जसमा बैंकले प्राथमिक पूँजीको ४०
प्रतिशत मात्रै शेयर कर्जा दिन पाउने प्रावधानलाई परिबर्तन गर्ने र बैंक वित्तीय संस्थाले दोस्रो बजारमा शेयर किन्दा होल्ड गर्नु पर्ने समय हटाइने खबरले पनि शेयर बजारलाई माथि लैजान सहयोग गरिरहेको छ।
यस साता शेयर बजारले सेन्चुरी मार्दै गर्दा सबैभन्दा बढी भूमिका उत्पादनमूलक समूहले खेलेको छ। उसको मात्रै उपसूचक ७.२४ प्रतिशतले बढेको छ। दोस्रोमा ७.१० प्रतिशतको वृद्धि सँगै जीवन बिमा समूहले दोस्रो भूमिका खेलेको छ। सबै समूहले यस साता सकारात्मक भूमिका खेल्दै गर्दा ट्रेडिङ समूह भने नकारात्मक रह्यो।
