मंगलवार सिंहदरबारमा बसेको मन्त्रिपरिषद्को बैठकले यस्तो निर्णय गरेको संघीय मामिला तथा सामान्य प्रशासनमन्त्री प्रतिभा रावलले जानकारी दिइन् । उनकाअनुसार बैठकले राष्ट्र बैंकको डेपुटी गभर्नरमा नेपाल राष्ट्र बैंकका कार्यकारी निर्देशक किरण पण्डित नियुक्त गरेको छ ।
उनले पेट्रोलियम पदार्थ आयातमा लगाउँदै आएको भन्सार करमा ५० प्रतिशत छुट दिने निर्णय गरेको पनि जानकारी दिइन् । बैठकले वृहत्तर लुम्बिनी क्षेत्र विकास परियोजनाको लागि विश्व बैंकले प्रदान गर्ने ८५ मिलियन अमेरिकी डलर बराबरको सहुलियतपूर्ण ऋण स्वीकार गर्ने निर्णय गरेको पनि जानकारी दिइन् । उनले ललितपुर महानगरपालिका वडा नम्बर ३ पुलचोकमा रहेको जलस्रोत तथा उर्जा अनुसन्धान केन्द्रलाई ललितपुर जिल्लाकै गोदावरी नगरपालिका वडा नम्बर ३ मा स्थानान्तरण गर्ने निर्णय गरेको समेत जानकारी दिइन् । उनले विगत पन्ध्र दिनमा पेट्रोलियम पदार्थको आपूर्तिका कारण आयल निगम ११ अर्ब बढी घाटामा गएको कारण मूल्य समायोजन गर्नुपरेको समेत बताइन् ।
उनले भने, ‘राष्ट्रिय योजना आयोगको उपाध्यक्ष पदमा डा. गुणाकर भट्ट, डोटीलाई नियुक्त गर्ने, राष्ट्र बैंकको २ रिक्त डेपुटी गभर्नर पदमध्ये एकमा नेपाल राष्ट्र बैंकका कार्यकारी निर्देशक किरण पण्डित नियुक्त गर्ने निर्णय गरेको छ ।’
उनकाअनुसार पेट्रोलियम पदार्थको आपूर्ति सहज बनाउन आवश्यक परेको खण्डमा सरकारले सवारी साधनमा जोर बिजोर प्रणाली समेत लागू गर्न सक्नेछ । उनले सरकारले आम नागरिकलाई वर्क फ्रम होम र विद्युतिय सवारीको प्रयोग बढाउन आह्वान गरेको पनि बताइन् ।
